DILI, (TATOLI) – Emprezária timoroan, Clarissa Lay, kandidata án ba Prezidente Kámara Komérsiu Indústria Timor-Leste (CCI-TL sigla iha portugés) períodu 2018 to’o 2022 iha kongresu ba datoluk, tanba hakarak hadi’a no dezenvolve nasaun ne’e, liuliu apoiu feto no mane iha área rurál.
“Ha’u prontu duni atu kandidata. Iha tempu naruk ne’ebé ha’u envolve iha CCI iha tinan 15 to’o mai agora ha’u hanesan vise-primeira Komérsiu, Indústria Kooperativa nian tanba haree ba buat barak ne’ebé tenke hadi’a”, Clarissa afirma iha Novu Turizmu, ohin, iha ámbitu asembleia jerál CCI-TL nian ba datoluk.
Nia hatutan: “Ita presiza kapasita ita-nia an nu’udar emprezária hodi bele dezenvolve ita-nia nasaun di’ak liu, liuliu iha rurál, iha pekena empreza no kooperativa sira ne’ebé maka ita hatene iha kooperativa 180 resin, maibé pratikamente la’o di’ak 40 resin, lato’o 50 no iha númeru mundiál ita iha 162 kotuk tebes kompara ho nasaun viziña Austrália iha númeru 13”.
“Tanba ne’e maka hanesan feto ida ha’u mós prontu atu kandidata. Hanoin katak iha futuru bele sai mós motivadora, sai emprezária feto ne’ebé maka bele fó matenek ne’ebé maka ha’u iha, kapasita mós iha mikro pekena empreza nomós kooperativa sira liuliu ita bele hasa’e kapasidade esportasaun, tanba ita-nia nasaun riku ho buat ne’ebé mak iha”, nia dehan.
Hatutan Timór riku ho tasi ne’ebé hale’u ita, rai ne’ebé kuda sasán ba moris de’it no iha buat barak mak bele atu esporta, la’ós kafé de’it.
“Futuru ita tenke prepara ona sai emprezáriu ne’ebé halo esportasaun no ita iha joven ne’ebé ho idade 25 barak liu, entaun produtivu tebes ita bele prepara hela kampu traballu ba sira”.
Nia dehan desizaun hotu depende kongresista. “Ita hein, tanba la’ós ha’u mesak mak kandidata, maibé karik iha maluk mane balun ou feto mós iha. Ha’u hanesan feto Timór orgullu tanba ita feto Timór mós tempu to’o ona atubele hamriik atu apoia liuliu ba maluk feto emprezária sira iha área rurál”.
“Iha esperansa boot no ha’u tenke sente bele. Dalan ita ema maka loke, la’ós dalan ne’e loke mesak kedan, ita maka loke, ita maka sei halo. Ita ema timoroan, ita maka tenke ser iha oportunidade ba buat riku soin ne’ebé Maromak fó mai ita”.
Tanba ne’e hanesan emprezária timoroan ida sente iha reponsabilidade atu apoiu mós ba feto no mane maluk ne’ebé presiza iha área hanesan turizmu, agrikultura no seluk tan.
Kongresu CCI-TL halo durante loron rua (11-12/10) no atu hili prezidente foun ne’e sei deside iha aban, nune’e Clarissa sei halo nia kampanã no planu ne’ebé nia sei halo bainhira kongresista sira eskolla nian.
Atuál prezidente CCI-TL maka Oscar Lima ne’ebé asume ona nia knaar durante períodu 2014 to’o 2018.
Jornalista: Maria Auxiliadora
Editora: Rita Almeida
