DILI, (TATOLI) – Asosiasaun Tane Konsumidór (ATC, sigla iha portugés) sujere atu aselera estatutu Eletrisidade Timor-Leste (EDTL) sai hanesan Empreza Públika (EP) ida atu masimiza nia prestasaun servisu.
Prezidente ATC, António Ramos da Silva, hatete ikus-ikus ne’e ahi mate beibeik no afeta ba konsumidór nomós ba Estadu tanba Estadu investe boot.
“Ne’e duni ami konsumidór identifika ona kauza husi problema, nia fundu, EDTL ne’e nia funsionamentu hanesan departamentu oan ida. Se fiu oan ida aat mós tenke ba finansa aprova mak foin bele rezolve sasán, depois ita iha sistema ida seidauk sofistikadu, ezemplu, ahi mate iha Palásiu para labele afeta iha Dili laran hotu tenke investe iha mákina ruma para izola tiha iha Palásiu ne’e sira seluk bele lakan”, António afirma iha Kolmera, ohin.
Hatutan bainhra ahi mate ne’e afeta liu maka konsumidór nia sasán elektrónika ne’e aas, mas ATC tenta atu serbisu ho Governu liuliu EDTL para ajuda hodi rezolve.
“Rezolve tanba identifika problema ne’e. Ami sujere ba Governu para aselera lalais muda estatutu EDTL nian envezde departamentu ida, mas nia ba empreza públika tiha tanba haree husi reseita, fulan ida sira bele hatama milliaun 2,5 enkuantu nia potensiál konsumidór ne’e mak Dili de’it, seidauk to’o munisípiu sira, mas Dili ne’e nia kontribuisaun ba reseita ne’e boot lahalimar”.
Bainhira ba EP signifika nia bele masimiza kualidade prestasaun servisu, nia vantajen hatama reseita ba Estadu nomós fó satisfasaun ba konsumidór sira.
“Ne’ebé ami-nia sujestaun ba Governu pelu menus iha 2019 ne’e eleva ona estatutu ne’e ba empreza públika. Governu anteriór, liuliu iha Kintu no Sestu rekomenda ona ba ADB atu halo estudu viabilidade ba EDTL nian ba empreza públiku”.
Katak tan: “Ne’e duni bolu atensaun Governu para implementasaun orsamentu 2019 nian ne’e bele aselera estatutu EDTL para hadi’a nia kualidade, aumenta reseita, nia iha autonomia desizaun. Mákina aat mós lapresiza halo proposta ba finansa hasai osan mai maka nia bele hola desizaun, klaru iha audit, kontrolu ba nia jestaun ne’e rasik”.
Jornalista: Maria Auxiliadora
Editora: Rita Almeida
Aseita total ATC nia hanoin. ida nee mak bolu dehan asosiaun diak ba nasaun. Laos hanesan LUTA HAMUTUK HODI lori sai FAHI HAMUTUK. tamba hanoin mak han deit no garganta deit.