AA Rekolla Ona Osan Millaun $65 Hosi Trajetu MF Millaun $72
DILI, (TATOLI)-Autoridade Aduaneira (AA) to’o ohin loron (husi janeiru-17 dezembru 2018) rekolla ona reseita hamutuk millaun $65 resin no falta semana rua tan atubele atinje trajetu ne’ebé Ministériu Finansas (MF) fó maka millaun $72.
Diretór Jerál AA, José António Fátima Abílio, informa sei iha semana rua atu to’o iha finál tinan ne’e no espera iha fin anu ne’e maka konsege kobre tan millaun $5 hanesan ne’e bele atinje alvu ne’ebé iha.
“Maibé labele, prontu, esforsu maka ne’e tanba Alfándega normalmente depende ba volume importasaun nomós excise tax. Kuandu volume importasaun maka’as maka merkadoria sira ne’ebé importa mai ne’e barak maka kona excise tax automátikamente nia sa’e, maibé la’e nia gráfiku ladún maka’as liu”, José afirma iha edifísiu AA, ohin.
Hatutan sobre númeru importasaun, importadór sira normalmente haree ba merkadu, bainhira prokura (demand) boot entaun volume aumenta no kuandu menus automátika redús.
“Iha mós parte seluk haree husi situasaun 2017 nian ne’e mós kontribui redusaun ba importasaun”, katak.
Diretór jerál ne’e esplika AA normalmente hetan reseita husi excise taxa ne’ebé kompostu husi iten sanulu maka hanesan serveza ne’ebé kona taxa $1.90 kada litru, viñu ka wine sira ne’e $2.50 pur litru, alkol sira kona $8.90 kada litru, tabaku kona $19 kada kilo, gazolina ka kombustivel kona $0.06 pur litru, automovel ka karreta sira luxu ne’e ho valór liu rihun $70 ne’e kona taxa 35%, armamentu ka munisaun kona 200%, eskeru 12% husi valór no ró paseiu no aviaun privada kona taxa 20% husi valór.
“Item sanulu ne’e maka kona excise. Ne’ebé ita hakarak atu hasa’e reseita ne’e, lei tributária tenke revee, depois tanke haree ona kona-ba import no export duty, tenke trajetu ona kona-ba la’ós halo pakote 2.5, maibé haree tuir ona tipu merkadoria ne’e”.
Atu rekolla taxa kada anu, AA mós halo projesaun porsentu 10 ba kada tinan tanba ema nia nesesidade ne’e aumenta tantu ba públiku no Estadu nian.
Sobre reseita sira ne’ebé rekolla antes iha 2016 hetan millaun $75 no iha 2017, millaun 73 ne’ebé lainkui retornu husi Oekusi nian.
Jornalista : Maria Auxiliadora
Editór : Manuel Pinto
