DILI, (TATOLI)-Ministru Agrukultura no Peska, Joaquim José Gusmão dos Reis Martins, halo enkontru informál ida ho Primeiru-Ministru (PM), Taur Matan Ruak, hodi ko’alia kona-ba serbisu ne’ebé hala’o durante ne’e no importante liu maka troka ideia kona-ba área potensiál iha Ministériu Agrikultura no Peska (MAP).
“No hanoin bá oin saida maka atubele hala’o liuliu ba halo planu ne’ebé di’ak liuliu iha orsamentu 2020”, ministru informa kuarta ne’e iha Palásiu Governu hafoin sorumutu.
Iha okaziaun ne’e ko’alia mós sobre obstákulu ne’ebé hasoru no serbisu bá oin saida maka hanoin atu dezenvole iha setór agrikultura.
“Primeiru-Ministru mós fó orientasaun, hanoin balun para bele foku iha traballu ne’ebé iha depois bele serbisu hamutuk ho ekipa iha ministériu no haree filafali saida maka hala’o ona estuda didi’ak no ne’ebé maka ita bele hala’o nafatin bá oin no ida ne’ebé maka tenke halo mudansa ita halo mudansa para iha buat ida ne’ebé ita bele oferese ba ita-nia povu”.
Hatutan instrusaun ne’ebé PM fó maka foku nafatin ba hare no batar nomós pekuária, peska no floresta. Enkuantu iha área peska Timor-Leste kada tinan lakon ikan iha Tasi-Mane tanba reskursu ne’ebé iha limitadu liu tanba ne’e maka PM fó hanoin atu elabora didi’ak saida maka bele halo atu ajuda setór peska nian liuliu serbisu ho entidade sira seluk hodi kombate peska ilegál.
Aleinde ne’e diskute mós sobre impaktu husi dezastre naturál ne’ebé akontese no estraga irrigasaun balun.
Ministru mós hato’o preokupasaun kona-ba orsamentu ba Sensu Agríkola 2019 ne’ebé sei hala’o iha marsu ne’e hodi bele haree fundu balun atubele tau ba atividade ne’e.
“Se iha janeiru ne’e labele, fevereiru ita tau osan balun para aselera prosesu Sensu Agríkola nian”.
Jornalista : Maria Auxiliadora
Editór : Manuel Pinto
