DILI, (TATOLI) – Polísia Nasionál Timor-Leste (PNTL) liuhosi Servisu Investigasaun Kriminál (SIK), inisia tinan ne’e rejista ona kazu hitu ne’ebé involve grupu arte-marsiál; Persaudaraan Setia Hati Terate (PSHT), Kmanek Oan Rai Klaran (KORK) no Ikatan Kera Sakti.
“Ami iha dadus ne’ebé rejista komesa 2016 kazu ladun barak, kazu hitu ne’ebé involve arte-marsiál tolu; Kera Sakti, KORK no PSHT iha 2019”, dehan Sub Xefe SIK, Inspetór Xefe Polísia Mouzinho T, Correia, ba Tatoli iha ninia servisu fatin Kuartel Jerál PNTL Kaikoli, ohin.
Mouzinho Correia hatutan hahú 2016 to’o inisiu 2019, ninia parte rejista kazu 43. Hodi akresenta kazu ne’ebé involve grupu arte-marsiál iha nivel nasionál aumenta 17, tanba rejista hosi munisípiu hotu. Enkuantu iha 2018 kazu 12.
Nia haktuir tipu krime hosi involvimentu grupu tolu ne’e hanesan konflitu, treinu subar no sa’e sintu iha Indonézia.
“Balun involve diretamente ba konfrontu baku malu, tuda malu no balun hala’o de’it sira nia atividade arte-marsiál. Purezemplu kazu PSHT sira barak liu hala’o atividade arte-marsiál; treinu subar no graduasaun (sa’e sintu) iha Indonézia liuhosi dalan illegál no balun uza pasaporte (legál), liuliu iha 2017 ne’e kazu barak liu PSHT”, afirma.
Enkuantu, IKS no KORK mós barak liu involve iha konfrontu entre arte-marsiál durante tinan hirak ne’e.
Inspetór Xefe ne’e dehan tan hosi kazu hitu iha 2016, ministériu públika haruka rua ba SIK hodi halo prosesu investigasaun.
Iha 2017 kazu 17, ministériu públiku delega tolu, 2018 kazu 12 maibé SIK simu rua hodi kompleta faktu, 2019 kazu hitu no rua maka ministériu públiku delega ba SIK.
PNTL rejista kazu krime hirak ne’e iha munisípiu Dili, Kovalima, Oekusi, Vikeke, Maliana, Baukau nomos munisípiu seluk.
“Iha Oekusi no Kovalima, Maliana rejista kazu ne’e ho númeru boot, tanba joven sira tama sai Indonézia hodi halo graduasaun, no Dili fatin konsentrasaun ema barak no fatin ema halo treinu no fatin ne’ebé dala barak mosu konfrontu”, konklui.
Ezisténsia atividade arte-marsiál bazea ba lei númeru 10/2008. Maibé Governu liuhosi Konsellu Ministru momentu governasaun Kay Rala Xanana Gusmão hasai rezolusaun númeru 16/2013 ne’ebé aprova iha 2 jullu 2013 hodi taka atividade arte-marsiál PSHT, KORK no IKS tanba ka kumpre deklarasaun ne’ebé asina iha maiu 2011 hodi respeita prinsípiu konvivénsia sosiál ne’ebé kontribui ba ambiente dame no estabilidade Nasaun.
Razaun seluk ne’ebé governu temi iha rezolusaun mak grupu balun hosi sira ne’e halo juramentu ho bandeira Indonézia nian no tama sai Indonézia, ilegalmente.
Alende ne’e prátika krime iha Indonézia ne’ebé hamosu mate, kanek todan no kauza seluk hanesan trauma ba estudante timoroan sira seluk. Konsiderasaun seluk mak intervensaun hosi PNTL no F-FDTL la solusiona konflitu ne’ebé akontese.
Jornalista: Agapito dos Santos
Editora: Rita Almeida
