DILI, 30 maiu 2019 (TATOLI) – Universidade Nasionál Timor Lorosa’e (UNTL) liuhusi Unidade Produsaun no Diseminasaun Koñesimentu Programa Pós-Graduasaun no Peskiza (UPDK-PPGP-sigla portugés) lansa livru sientífiku haat hodi tulun prosesu aprendizajen, iha sala auditóriu UNTL, kinta (30/05).
Livru ne’e mak hanesan “A construção do sintagma nominal do português”, Metodolojia hanorin língua tetun iha 1o no 2o siklu ensinu báziku no mós “Leitura atuais sobre língua, ensinu e didáctica em Timor-Leste” ho “Desafios da educação em Timor-Leste”.
Objetivu husi lansamentu livru ne’e mak hodi aumenta liután koñesimentu komunidade no nivel akadémiku enjerál.
Responsavel UPDK-PPGP, Vicente Paulino hateten, husi livru haat ne’e, livru rua ho autór hanesan profesora Flávia Maria Augusta Martins, nu’udar dosente Departamentu Komunikasaun Sosiál (DKS) kona-ba “A construção do sintagma nominal do português” no Metodolojia hanorin língua tetun iha 1o no 2o siklu ensinu báziku ho autora Rosa da Costa Tilman, nu’udar profesora iha Fakuldade Edukasaun, Arte no Umanidade (FEAU), UNTL.
“Konteúdu livru ne’e hahú husi prinsípiu ida katak, profesora sira tenke iha koñesimentu kona-ba maneira hanorin alunu sira oinsá bele kapta lalais konteúdu ne’ebé profesora sira fó, no livru ne’e simples tanba abordajen bázika, tanba haree mós labarik sira-nia kapasidade atu komprende matéria ne’ebé maka sei hato’o iha siklu seguinte,” dehan Responsável Vicente Paulino.
Enkuantu, livru ne’ebé mak ho autora Flávia Maria Augusta Martins ne’e, Responsável UPDK-PPGP, Vicente Paulino hateten katak livru ne’e haree husi tetun no portugés tanba tetun hetan influénsia husi portugés.
“Signifika profesora nia hanoin atu lori alunu sira atu komprende buat rua, kuandu aprende lian portugés automatikamente sira mós tenke komprende ona konstrusaun sintoma nominál iha Tetum ne’e oinsá; vise versa, liafuan rua ne’e hanesan liafuan maun-alin, tanba lingua rua ne’e nia dezenvolvimentu la’o hamutuk,” konsidera responsavel UPDK-PPGP ne’e.
Iha biban hanesan, Responsável UPDK-PPGP, Vicente Paulino informa katak livru rua seluk hanesan “Leitura atuais sobre língua, ensinu e didáctica em Timor-Leste” ho “Desafios da educação em Timor-Leste” ne’e autór sira ne’e kompostu husi profesór timoroan sira no mós Brazil ho Portugal.
Objetivu prinsipál mak autór sira hakarak hato’o sira-nia matenek ba komunidade iha nivel akadémika no mós iha ensinu báziku primeiru to’o terseiru siklu no sekundáriu sira.
“Prinsípiu ida maka sira dehan, ami lakohi ami-nia obra ne’e iha gaveta de’it, maibé ami mós iha obra atu fó sai ba públiku katak ami iha obra atu fahe ami-nia matenek ba komunidade sira,” konsidera Responsável Vicente Paulino.
Livru haat ne’ebé UNTL lansa ohin, “Leitura atuais sobre língua, ensinu e didáctica em Timor-Leste” ne’e kompostu husi pájina 105 no rejistu ho ISBN (International Standar Book Number) 978-989-8915-12-2.
Livru “Desafios da educação em Timor-Leste” kompostu husi pájina 133 no rejistu ho ISBN 978-989-8915-02-3. Livru rua ne’e nu’udar kompozisaun rezultadu peskiza husi profesór timoroan sira, brazileiru no portugés sira.
Tuir mai, livru ho autór úniku mak livru ho títulu “A construção do sintagma nominal do português”, ne’ebé kompostu husi pájina 77 no rejistu ho ISBN 978-989-8915-11-5.
Seluk mak livru ho títulu Metodolojia hanorin língua tetun iha 1o no 2o siklu ensinu báziku, ne’ebé kompostu husi pájina 125 no rejistu ho ISBN 978-989-8915-10-8.
Profile autór úniku sira
- Flávia Martins
Livru ho títulu “A construção do sintagma nominal do português” nia autór mak Flavia Maria Augusta Martins, nu’udar profesora permanente iha Fakuldade Siénsia Sosiál (FSS), UNTL no hanorin disiplina língua portugeza (LP).
Profesór Flavia Martins lisensiada iha Língua no Literatura Moderna variante Portugés no Inglés (LLM-PI) husi Fakuldade Letras, Universidade do Porto (2007).
Mestre iha Língua no Linguístika Portugeza (LLP) husi Universidade Nasionál Timor Lorosa’e (UNTL).
- Rosa da Costa Tilman
Livru ho títulu Metodolojia hanorin língua tetun iha 1o no 2o siklu ensinu báziku nia autór mak Rosa da Costa Tilman. Atualmente profesora iha FEAU-UNTL.
Autora nu’udar espesialista iha área linguístika no hala’o mós kna’ar nu’udar peskizadora no tradutora iha INL (Instituto Nacional de Linguística).
Profesora Rosa da Costa Tilman hamutuk ho Profesór Doutór Benjamin Corte Real de Araújo no Profesór Doutór José Aderito Guterres Correia no ekipa halo Disionáriu Nasionál ba Tetun Ofisiál, no ida ne’e nu’udar obra dahuluk.
Obra sira seluk ne’ebé autora halo ona, maibé hein atu publika maka hanesan: Estudu Fonolójiku ba erru pronúnsia fonema vogál inglés nian husi Departamentu Inglés iha FEAU-UNTL; Karakterístiku Bunak Súl nian; Disionáriu Bunak-Súl – Tetun.
Jornalista : Nelia Rosario
Editór : Rafy Belo
