DILI, 09 jullu 2019 (TATOLI)-Autoridade Inspesaun Fiskalizasaun Ekonomia Alimentár Sanitária (AIFAESA) apela ba operadór ekonómiku sira iha rai laran atu labele fa´an sasan ne’ebé liu prazu.
“Husu ba ita-nia operadór ekonómiku sira liliu ba loja, supermerkadu, distribuidór na´in sira atu labele kontinua fa’an produtu ne’ebe liu ona prazu,” husu Diretór Operasaun AIFAESA, Gabriel da Costa iha entrevista ho Ajénsia TATOLI, iha nia kna´ar fatin, Matadouro, tersa (09/07/2019).
Tanba ne’e, nia husu ba operadór ekonómiku sira Kuandu produtu ne’ebé besik ona liu prazu no estragadu atu tau atensaun. “Bele hato’o mós informasaun mai iha AIFAESA hodi nune’e toma medida koopera serbisu hamutuk hodi bele halo destruisaun”.
Tuir Diretór Operasaun AIFAESA ne’e katak, ita labele hanoin de’it mak osan maibé haluha tiha ita-nia saúde. Tanba ne’e, husu atu tau atensaun no labele kontinua fa´an sasan ne’ebé liu prazu. Tanba bainhira produtu ne’ebé liu prazu utiliza konsumu afeita ba ema nia saúde.
Iha parte seluk, nia mós husu ba konsumidór sira bainhira ba sosa sasan iha loja, supermerkadu, hetan sasan ne’ebe liu prazu atu informa lalais mós ba AIFAESA hodi foti medida.
“AIFAESA mai ho misaun ida atu proteze saúde públika ba konsumidór hotu tanba ne’e nafatin serbisu ho responsavilidade atu servi ema hotu,”nia haklaken.
Jornalista : Nelson de Sousa
Editór : Rafy Belo
