DILI, 25 jullu 2019 (TATOLI)–Prezidente Parlamentu Nasionál (PPN), Arão Noe de Jesus da Costa Amaral informa hafoin Komisaun tolu halo ona redasaun finál ba Pakote Lejizlativa Tratadu Fronteira Marítima, nia parte hamutuk ho asesór jurídiku sira aprova no ohin manda ona ba Prezidente Repúblika (PR), Francisco Guterres Lú Olo, hodi halo análize ba diploma hirak ne’e molok foti desizaun.
“Ohin haruka duni. Dadér ne’e ami haree tiha no loos ona, dokumentu lima kedas entaun sira tenke halo imprime folla no prepara karta ba señor Prezidente Repúblika”, nia tenik ba jornalista sira iha Parlamentu nasionál (PN), kinta ne’e.
Arão dehan, PN hein desizaun saida de’it husi Xefe Estadu no bainhira iha opsaun seluk, PN prontu kontinua prosesu tanba órgaun idak-idak tenke kumpri regra konstituisionál no legál ne’ebé hatuur ona.
Hatán ba desizaun Bankada FRETILIN vota kontra Pakote Lejizlativa, Arão konsidera laiha impaktu tanba desizaun kompeténsia PR no tuir Konstituisaun, aprovasaun ba kualker diploma tenke ho maioria votu 33 resin.
Tuir Konstituisaun RDTL artigu 85 hateten katak, PR bele promulga ka veta ne’e kompeténsia Xefe Estadu nian.
Jornalista: Evaristo Soares Martins
Editór: Xisto Freitas
Notísia Relevante:
PN Aprova Ona Proposta Lei Haat iha Finál Globál
PN Aprova Rezolusaun Ratifikasaun Tratadu Entre RDTL no Austrália iha Finál Globál
