DILI, 26 jullu 2019 (TATOLI)-Governu liuhusi Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, lansa ona sentru mídia (media center) hodi fasilita informasaun ba públiku relasiona ho komemorasaun loron Konsulta Populár 30 Agostu no Misaun INTERFET (Forsa Internasionál ba Timor-Leste) ba da-20 iha tinan ne’e.
Merício Juvinal husu ba instituisaun sira hanesan Rádiu Televizaun Timor-Leste (RTTL), Ajénsia Notisioza Timor-Leste TATOLI no parte hotu iha SEKOMS atu apoia ba instalasaun sentru mídia, nune’e públiku bele asesu informasaun ho di’ak liu liga ba eventu istóriku ne’e.
“Ha’u hakarak hotu-hotu apoia media center”, Merício afirma iha lansamentu ne’ebé hala’o iha Palásiu Governu, ohin.
Governante ne’e husu mós ba estrutura sira media center nian atu kolabora ba malu, nune’e fasilita informasaun ne’ebé di’ak ba públiku ho orientada hodi fó susesu ba eventu importante sira ne’e.
Koordenadór ba media center, atuál Prezidente Ajénsia TATOLI, José da Costa, dehan sentru ba mídia nee rasik sei sai hanesan espasu ba jornalista sira hotu atubele asesu tantu liuhusi online, komunikadu imprensa ne’ebé liga ho asuntu komemorasaun 30 Agostu.
“Media center ne’e rasik sei la’o durante oras 24, durante komemorasaun eventu importante no media center ne’e rasik sei uza versaun portugés no inglés”, nia afirma.
Aléinde ne’e, sentru mídia rasik sei hetan asisténsia másima husi SEKOMS no Ministériu Reforma Lejizlativa no Asuntu Parlamentár (MRLP) nune’e maximiza servisu sira.
Fatin ne’ebé sei uza atu sai hanesan media center maka salaun reuniaun Prezidénsia Konsellu Ministru nian.
Iha lansamentu ne’e marka prezensa husi Prezidente RTTL, Francisco da Silva “Gari” , koordenadór ba komemorasaun 30 Agostu ba da-20, Hugo Fernandes, diretór no funsionáriu sira husi SEKOMS no mídia nasionál sira.
Jornalista : Natalino Costa
Editora : Maria Auxiliadora
