DILI, 29 jullu 2019 (TATOLI)—Governu liuhusi Ministériu Ensinu Superiór Siénsia no Kultura (MESSK), hamosu ona Diploma Ministerial ba Instituisaun Ensinu Superiór Públiku hanesan Universidade Nasionál Timor-Leste (UNTL) no Institutu Politékniku Betano (IPB), nu’udar polítika ida atu bele garante di’ak liután kualidade edukasaun ba estudante foun sira.
“Magnífiku Reitór UNTL hamutuk ho Prezidente IBP sai sasin ba asinatura Diploma Ministeriál ne’e iha loron 29 jullu 2019. Ita asina Diploma Ministeriál ne’ebé atu fó biban ba UNTL no IPB atu bele ezekuta polítika ida ne’e baihira hala’o prosesu ingresu, rekrutamentu ba estudante foun sira,” dehan Ministru Ensinu Superiór Siénsia Kultura (MESSK), Longuinhos dos Santos, ba jornalista sira iha Salaun Enkontru Fundus Dezenvolvimentu Capital Humano (FDCH), Fatuhada, segunda (29/7/2019).
Kriasaun Diploma Ministeriál ne’e rasik, nia hatutan, nu’udar giaun ida para Instituisaun ne’e bele asesu ingresu ba prosesu rekrutamentu estudante foun sira bainhira atu hetan fatin iha UNTL, atu garante kualidade, transparénsia no mós tenke kumpre lei ne’ebé iha.
Nia dehan, Diploma ministeriál ne’e sei sai hanesan matadalan ida atu regula estudante foun sira tama iha instituisaun públiku UNTL. Nia informa, prosesu kona-ba Diploma ministeriál ne’e la’o daudaun ona maibé tuir planu sei implementa iha 2020.
Iha biban hanesan, hafoin akompaña asinatura Diploma Ministeriál ne’e, Magnífiku Reitór UNTL, Francisco Miguel Martins, hateten orgullu ba kriasaun diploma ministeriál ne’e. Tanba, tuir nia, antes ne’e seidauk iha polítika ida husi Governu anteriór maibé ida ne’e faze dahuluk husi VIII Governu Konstitusionál atu apoiu liután Instituisaun públika, UNTL no IPB.
“UNTL nu’udar Instituisaun formadór, instituisaun atu eduka ema sai ema no instituisaun estadu nian sei kolabora no respeitu regulamentu ne’ebé Governu kria ona. Nune’e, bele fó liután formasaun ida di’ak ba estudante sira ne’ebé futuru mai sei sai lideransa ida di’ak ba dezenvolvimentu rai ida-ne’e nian,” esplika Magnífiku Reitór, Francisco Miguel Martins
Jornalista: Tomé Amado
Editór : Rafy Belo
