DILI, 01 agostu 2019 (TATOLI) – Profisionál saúde Hospital Nasionál Guido Valadares (HNGV) kompostu husi médiku, enfermeiru no mós parteira sira hamutuk ema na’in 15 husi Departamentu Emerjénsia, Maternidade no Pediatria partisipa formasaun kona-ba point of care quality improvement ka hadi’a kualidade pontu atendimentu durante loron ida, iha sala enkontru HNGV, kinta (01/08/2019).
Diretór Ezekutivu HNGV, Aniceto Cardoso Barreto informa katak semináriu ne’e sei implementa tan ba oin fokus ba iha kualidade atendimentu ba moras liuliu inan ho bebé sira tanba, tuir nia, nasaun agora ne’e nia orientasaun muda no orientasaun ne’e la’ós de’it ba servisu atendimentu baibain. Maibé, fokus didi’ak ba nia kualidade atendimentu.
“Kestaun moras mortalidade inan ho oan sei aas iha mundu tomak, tanba ne’e mak saúde mundiál orienta ba Ministériu Saúde no agora ospitál mós sai hanesan primeiru tratamentu, garante atendimentu kontinua no elevasaun koñesimentu iha ita-nia pesoál sira iha área servisu hodi redús mortalidade inan ho oan sira,” dehan Diretór Aniceto Cardoso Barreto ba jornalista sira.
Nia dehan, mortalidade inan ho oan nian sei iha problema tanba primeiru uza halo ba diagnóstiku, segundu deteta moras hodi bele halo atendimentu ba pasiente sira. Ekipamentu la iha problema importante mak ema nia koñesimentu atu bele uza ekipamentu ne’ebé mak iha, bele uza maneira hodi halo tratamentu nian hodi bele eleva servisu ne’e di’ak liután.
“Ita haree ba mortalidade mensál ninia iha fulan juñu iha 3.467 pasiente ne’ebé mak baixa 5.8% signifika katak mortalidade sei iha maibé nia númeru ne’e la boot liu kompara fulan rua ka tolu liu ba,” tenik Diretór Aniceto.
Alende ne’e, liga mós ba inan ho oan iha maternidade mak fokus liu ba bebé sira ne’ebé mai kuaze fulan neen, daudauk ita hetan mais 16 kazu no bebé ne’ebé mate iha inan nia isin-laran to’o mai ne’e médiku sira la konsege salva, tanba dalaruma inan sira mai tarde la konsege deteta bebé iha inan nia kabun laran sei moris ka lae.
“Ida ne’e kestaun boot ida hodi ami diskute ho ministériu saúde ajénsia balun ne’ebé mak ajuda ita atu redús mortalidade hirak ne’e,” Aniceto esklarese.
Notísia relevante: http://www.tatoli.tl/2019/06/04/susubeen-inan-mak-bele-redus-mortalidade/
Jornalista: Felicidade Ximenes
Editór : Rafy Belo
