DILI, 5 agostu 2019 (TATOLI)—Prokuradór Jerál Repúblika (PJR), José da Costa Ximenes preokupa ho kazu soe bebé ne’ebé ikus-ikus ne’e kontinua akontese iha Dili laran.
Ximenes konsidera katak kazu ne’e hanesan kazu krime ne’ebé sériu tebes no tenke buka solusaun hamutuk. Maibé, tuir nia, família (inan-aman) mak sai xave prinsipál ka importante atu halakon kazu refere.
Lee mós:
Soe Bebé, La Refleta Kultura TL
PR Lú Olo: Justisa Tenke Sériu Julga Kazu Soe Bebé
Presiza Investiga Kle’an Kauza Hosi Inan Soe Bebé
Igreja Kondena Inan Deskoñesidu Soe Bebé
Nia dehan, atu halakon krime ne’e mak tenke investiga hodi buka hatene kauza loloos, tanba saida mak ema soe bebé.
“Bainhira halo investigasaun, tenke haree hosi aspetu hotu-hotu. Primeiru, tenke haree kondisaun ina-aman hosi bebé ne’e rasik. Segundu, haree hosi aspetu família katak ikus-ikus ne’e ema barak mai hosi foho hela iha Dili, iha ne’ebé la konsege hetan kontrolu hosi inan-aman,” Prokuradór Jerál ba jornalista sira iha Palásiu Prezidente Nicolau Lobato, Bairru Pité, ohin.
Iha sidade, Ximenes informa, ohin loron ema hotu livre sesesu ba internet no hosi internet ne’e rasik fó mós kontribuisaun boot ba kazu ne’e.
Aspetu seluk, nia salienta, bainhira tama ona iha situasaun ne’e, feto sempre moris iha presaun psikolójika, tanba karik ninia namoradu laiha responsabilidade no aktu ne’ebé feto hili mak tenke soe bebé. Prokuradór Jerál mós konkorda atu tau regra ida ne’ebé forte, maibé tenke haree no tetu haree hosi aspetu hotu.
Nia informa mós katak to’o oras ne’e, úniku kazu ida mak halo aprezentasaun periódika no sira seluk Polícia Nacional Timor-Leste (PNTL) infrenta difikuldade atu buka tuir ka deskobre.
Nia haktuir, durante ne’e, ema barak haree labarik hanesan objetu ba lei, maibé prokuradór ne’e dehan, labarik ne’e dezde iha ninia inan nia knotak, sai ona hanesan sujeitu ba lei.
Jornalista: Cipriano Colo
Editór: Xisto Freitas
