DILI, 06 agostu 2019 (TATOLI)-Oitavu Governu Konstitusionál liuhusi Ministériu Obra Públika (MOP) deside ona data fiksu ba lansamentu fatuk dahuluk ba konstrusaun estrada trosu Baukau bá Venilale no Venilale bá Vikeke iha loron 9 agostu ne’e.
Ministru Obra Públiku (MOP), Salvador Eugénio Soares dos Reis Pires, dehan Unidade Jestaun Projetu (PMU, sigla inglés) ho kontraktor no konsultór sira hala’o preparasaun atu halo lansamentu fatuk dahuluk.
“Sesta (09/08) agora ita sei halo lansamentu fatuk dahuluk ba pakote rua dala ida hanesan pakote estrada trosu Baukau bá Venilale no Venilale bá Vikeke,” Ministru Salvador afirma iha Ministériu Finansa, Aitarak-Laran, ohin.
Nia dehan lansamentu fatuk dahuluk ne’e sei hala’o iha postu administrativu Venilale. “Ami informa ona ba Primeiru-Ministru, maibé tempu iha bele halo lansamentu se laiha bele delega MOP atu halo lansamentu”.
Data fiksu ne’e, nia dehan deside hafoin tékniku sira ezekuta halo reuniaun pre-konstrusaun ho kontraktor no konsultór, inklui Banku Dezenvolvimentu Aziátiku (ADB) hodi hala’o identifikasaun fatin sira atu hafasil kompañia kontraktor bele halo mobilizasaun pezada sira hodi bele hala’o konstrusaun.
Projetu estrada trosu Baukau-Venilale no Venilale-Vikeke ka’er husi kompañia internasionál China Overseas Engineering Group (COVEC) ho kilómetru 60 ho orsamentu empréstimu husi ADB ho totál millaun $40-resin ho durasaun konstrusaun tinan rua.
Projetu ne’e liuhusi konkursu públiku husi Komisaun Nasionál Aprovizionamentu no hetan ona vistu préviu husi Câmara de Contas.
Jornalista: Florencio Miranda Ximenes
Editora : Maria Auxiliadora
