DILI, 6 agostu 2019 (TATOLI)—Deputadu Bankada Opozisaun FRETILIN, Joaquim dos Santos, konsidera Rejiaun Administrativa Espesiál Oé-Cusse Ambeno (RAEOA) iha estatutu ketak, tanba ne’e labele trata hanesan munisípiu seluk.
“RAEOA ita labele trata hanesan munisípiu sira babain ne’e. RAEOA mós ita labele trata hanesan Konsellu Administrasaun ida tanba sira goza autonomia espesiál iha polítika administrativa no ekonomia”, tenik Deputadu Joaquim iha Parlamentu Nasionál (PN), tersa ne’e.
Deputadu Bankada Opozisaun ne’e argumenta, kualkér lejizlasaun tenke bazeia ba prinsípiu konstituisaun ne’ebé fó ba RAEOA, tanba ne’e Bankada FRETILIN la-konkorda muda kompeténsia ne’ebé lei fó.
Nia haktuir, bainhira halo alterasaun ba estatutu RAEOA-ZEESM ne’e, Bankada FRETILIN konsidera viola Konstitusaun artigu 71, tanba Oé-Cusse nu’udar rejiaun espesiál ne’ebé goza autonomia espesiál, polítika no ekonomia.
Nia esplika, alterasaun artigu 19 husi estatutu RAEOA-ZEESM, prevee sé mak iha kapasidade aprezenta kandidatu Prezidente Autoridade RAEOA mak Primeiru-Ministru.
“Dezde Primeiru-Ministru konkorda, Prezidente Repúblika mós konkorda hafoin fó pose, tanba reprezentante ba Oé-Cusse la’ós hanesan administradór babain, nia ba reprezenta Estadu”, nia dehan tan.
Nia hatutan: “Konstitusaun dehan Oé-Cusse de’it, laiha tan seluk. Bele mosu munisípiu rua ka tolu tan iha Oé-Cusse, depende ba evolusaun. Lei ida uluk ita halo ne’e labele eleitu, tenkeser nomea de’it para reprezenta estadu hafoin submete ba órgaun sentrál”, argumenta Deputadu Joaquim dos Santos.
Kona-ba Alterasaun Lei númeru 3/2014 estatutu RAEOA-ZEESM, PN hatán ona karta husi Tribunál Rekursu hafoin simu notifikasaun.
Jornalista: Evaristo Soares Martins
Editór: Xisto Freitas
Notísia Relevante: PN Mantein La Muda Konteúdu Alterasaun Estatutu RAEOA-ZEESM
