AILEU, 09 agostu 2019 (TATOLI)-Klase paralela rua ne’ebé loke husi Fakuldade Edukasaun no Saúde (FES), Instituto Superior Cristal (ISC) iha Munisípiu Aileu amesadu taka husi governu liuliu Ministériu Ensinu Superiór Siénsia no Kultura (MESSK) tanba nunka hetan lisensa.
Tuir padraun ne’ebé iha klase paralela ida atu loke tenke nafatin garante kualidade, tenke tau atensaun ba rekursu umanu, dosente tenke prienxe rekizitu, fasilidade sala aula tenke adekuadu, biblioteka no laboratóriu tenke sufisiente, kurríkulu tenke klaru inklui mós oráriu.
“Maibé ISC ne’ebé loke ninia klase paralela ne’e la kompleta padraun sira ne’e. Tan ne’e MESSK iha ona pozisaun katak desizaun klase ne’e tenke hapara ninia prosesu ensinu aprendizajen ne’e konsekuénsia ida,” insiste Ministru Ensinu Superiór, Siénsia no Kultura, Longuinhos dos Santos perante jornalista sira iha Suku Bandudato, Postu Administrativu Aileu Vila, sesta (09/08/2019)
Ministru Longuinhos dos Santos dehan ba Koordenadór klase paralela ISC Aileu katak klase paralela bele loke maibé presiza fó atensaun ba kondisaun no fasilidade sira. Maibe klase ne’e la kumpre konserteza kuandu governu taka ne’e konsekuénsia.
“Ha’u deteta tiha ona klase ne’e la hetan lisensa, obriga an nafatin loke klase ne’e maibé laiha fasilidade tanba ne’e mak governu ezije ba institutu atu trava ninia prosesu ensinu aprendizajen, kompleta tiha lai prosedimentu ka regra sira depois mak kontinua,” haktuir ministru ba mídia sira.
Governante ne’e hateten, ema hotu iha interese hodi tau importánsia ba edukasaun maibé antes ne’e tenke prepara uluk kondisaun hafoin bele loke prosesu inskrisaun hodi simu estudante sira. La’ós simu tiha estudante sira, hala’o tiha prosesu aprendizajen mak hadi’a ninia kondisaun ne’e la loos.
“Ita atu lori estudante sira ba ne’ebé? Oinsá sira atu kompete iha merkadu traballu kuandu sira laiha koñesimentu sientífiku?. Tanba ne’e mak fasilidade ida atu garante kualidade estudante sira nian ne’e mak laboratóriu no biblioteka ne’e,” nia dehan.
Enkuantu, Ministru Longuinhos dos Santos hafoin haree tiha kondisaun klase paralela ISC ne’e, husu ba koordenadór klase paralela ISC Aileu katak kuandu desizaun finál nian husi MESSK ne’e hatún ona tenke kumpre.
“Maibé agora sei falta munisípiu lubuk ida mak seidauk kobre, kuandu hotu ona desizaun sei to’o ISC nia gabinete,” ministru informa.
Notísia relevante: MESSK: “Tenke Garante Nafatin Kualidade Klase Paralelu”
Jornalista : Tomé amado
Editór : Rafy Belo
