DILI, 14 agostu 2019 (TATOLI)—Komunikadu imprensa ne’ebé fó sai hosi Mídia Palásiu Prezidensiál, Dili, 14 agustu 2019, hateten, Prezidente Repúblika fó pose ba Embaixadór na’in-tolu, iha 13 agostu 2019, bazeia ba Konstituisaun Repúblika Demokrátika Timor-Leste, artigu 87, alínea b.
Embaixadór na’in-tolu simu ona akordu/agreement, iha tinan 2018, hosi nasaun sira ne’ebé sei hala’o sira-nia funsaun (rua hosi sira hetan akordu/agreement liu tinan-ida ona; ba datoluk, liu ona fulan-sia). Importante atu fó-sai katak Embaixadór na’in-tolu, ne’ebé Prezidente Repúblika fó pose, nu’udar diplomata karreira no funsionáriu superiór hosi Ministériu Negósiu Estranjeiru no Kooperasaun (MNEK).
Lee mós: Prezidente Repúblika Pose Embaixadór TL na’in Tolu
Atu fó tomada pose, presiza simu akordu/agreement hosi nasaun sira ne’ebé Embaixadór sei akreditadu. Iha 31 jullu 2019, Gabinete Ministru Negósiu Estranjeiru no Kooperasaun, haruka ofísiu ida (Ref.1089/GM-MNEK/VII/2019, ho data), ne’ebé anexa kópia akordu/agreement, ba Embaixador na’in-tolu, atu halo nomeasaun no fó tomada pose ba sira.
Tanba ne’e, Prezidente Repúblika publika dekretu tolu ba nomeasaun no fó-sai ajenda serimónia tomada pose ba 13 agostu 2019, tuku 09H30, iha Palásiu Prezidensiál.
Iha 9 agostu 2019, Prezidénsia Repúblika (PR) haruka ofísiu ida ba Xefe Gabinete Ministru Negósiu Estranjeiru no Kooperasaun-nian, Agustinho Caet, atu informa kona-ba data serimónia ba tomada pose. Prosesu ne’e hotu hala’o ho dalan koordenada entre MNEK ho Prezidénsia Repúblika.
Sira na’in-tolu, ne’ebé simu tomada pose, hanesan funsionáriu superiór MNEK ne’ebé sei reprezenta Estadu Timor-Leste iha rai-li’ur.
Nune’e, prezensa Ministru Negósiu Estranjeiru no Kooperasaun sai indispensável no, tuir prátika baibain, laiha nesesidade atu haruka konvite hodi husu prezensa Ministru Negósiu Estranjeiru no Kooperasaun, iha tipu serimónia ida ne’e, ne’ebé prezide hosi Xefe Estadu.
Jornalista: Cipriano Colo
Editór: Xisto Freitas
