DILI, 15 agostu 2019 (TATOLI) – Atu hala’o knar prevensaun no kombate korrupsaun ho efetivu no efikásia, Komisaun Anti Korrupsaun (CAC-sigla portugés) presiza ema hotu nia kontribuisaun no ‘tulun’. Hahú kedas Xefe Estadu, Xefe Governu, órgaun lejizlativu, konvensaun relijiozu, sosiedade sivíl no povu tomak.
Notísia Relevante : KAK Propoin Kargu Xefia Aprezenta Rikusoin
Komisáriu Adjuntu KAK ba Prevensaun no Sensibilizasaun, Luis de Oliveira Sampaio, afirma, atu kombate aktu korrupsaun la’ós servisu KAK nian de’it, maibé ema hotu iha obrigasaun morál kontribui hodi servisu hamutuk ho KAK.
“KAK mesak la bele halo buat. Ho razaun, rekursus umanus KAK nian liuliu iha diresaun prevensaun no sensibilizasaun hamutuk na’in 15 deit,” hateten Luis Oliveira Samapio.
KAK nu’udar órgaun estadu ne’ebé mak independente hala’o ninia knaar hotu hanesan fó formasaun ba dirijente no kargu xefia sira kona ba aprovizionamentu ninian, krime pekulatu, falsifikasaun dokumentu, kazu korrupsaun ativa no pasiva, abuzu podér no krime partisipasaun ekonomia.
Foin daudaun KAK mós halo ona vizita surpreza ba instituisaun Estadu balun atu kontinua fó hanoin no rekomenda buat balun atu hadi’a, nune’e lalika prejudika ba servisu estadu liuliu kestaun finanseira.
“Ami nia hanoin nu’udar knaar obrigatóriu, buat nee labele KAK mesak, maibé enkaixa mós ministériu relevante sira liuhosi pontu fokál sira atu hot-hotu hola parte iha movimentu ba prevensaun ninian,” hateten Luis Oliveira Sampaio, ba Ajénsia TATOLI, ohin, bainhira partisipa semináriu kona ba prevensaun no sensibilizasaun iha Otél Ramelau.
Nia esklarese mós katak, atu aselera servisu KAK nian di’ak liu tan depende mós ba polítika estadu nian, oinsá tau tan orsamentu hodi rekruta peritu no espesialista balun hodi aumenta kuantidade no fó formasaun adekuadu.
Eis Diretór Ezekutivu Judicial System Monitoring Programe (JSMP) ne’e husu mós ba iha sosiedade sivíl, igreja, sidadaun hot-hotu inklui mós órgaun komunikasaun sosiál atu toma atensaun mós ba kombate korrupsaun hodi hala’o knar ho rigor no sai mós ajente kontrola sosiál ba órgaun Estadu.
Jornalista : Domingos Piedade Freitas
Editór : Francisco Simões
