DILI, 15 agostu 2019 (TATOLI)—Primeiru-Ministru (PM), Taur Matan Ruak, husu ona ba Ministru Negósiu Estranjeiru no Kooperasaun, Dionísio da Costa Babo Soares atu fó tan informasaun ba Gabinete Prezidente Repúblika (PR), kona-ba kandidatu Embaixadór Timor-Leste nian ne’ebé Xefe Estadu seidauk fó pose.
Primeiru-Ministru hateten lista kandidatu embaixadór sira ne’ebé governu haruka ona ba Prezidente Repúblika, seidauk bele simu pose tanba iha balun ne’ebé presiza hadi’a.
Xefe Governu deklara asuntu ne’e, hafoin enkontru semanál ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pite, Dili, ohin.
“Ha’u husu ona ba Ministériu Negósiu Estranjeiru no Kooperasaun (MNEK) atu fó tan informasaun ba Gabinete Prezidente Repúblika, tanba iha balun ne’ebé presiza hadi’a, nune’e bele haree preparativu saida mak bele halo ba tomada pose”, hateten Taur.
Entretantu, lista kandidatu Embaixadór sira ne’ebé governu haruka ba Prezidente Repúblika mak hanesan:
- Inês Maria de Almeida, Embaixadora TL ba Camberra, Austrália
- Gil da Costa, Embaixadór TL ba Reinu Unidu Gra Británia no Irlanda Norte
- José Luís Guterres, embaixadór TL ba Konfederasaun Suiça
- Paulo Assis Belo, embaixadór TL ba Repúblika Moçambique
- Lisualdo Menezes Coimbra Gaspar, embaixadór TL ba Wellingtong Nova Zelándia
- Isílio António de Fátima Coelho da Silva, embaixadór TL ba Washington DC, EUA.
- Isabel Amaral Guterres, embaixadora TL ba Lisboa, Portugal
- Isabel Amaral Guterres, reprezentante permanente TL ba sekretariadu ezekutivu CPLP
- Isabel Amaral Guterres, embaixadora la rezidente TL ba Repúblika Cabo Verde.
- Olímpio Maria Alves Gomes Miranda Branco, embaixadór TL ba Repúblika Brazíl
- Maria Natália Guterres Viegas Carrascalão, embaixadora ba Singapura
- Ilídio Ximenes da Costa, embaixadór TL ba Japaun
- Hermenegildo Lopez, embaixadór TL ba Kambódia
- Abrão dos Santos, embaixadór TL ba Repúblika Populár Xina
- Joanna Veneranda Amaral, embaixadora TL ba Santa Sé
- Armandina Maria Gusmão dos Santos, embaixadora TL ba Reinu Tailándia.
Hosi lista ne’e, na’in tolu mak simu ona pose ne’ebé tuir planu iha tempu badak sei dezloka ba nasaun ne’ebé atu ba, no restante hein Prezidente Repúblika fó pose.
Journalista: Cipriano Colo
Editór: Xisto Freitas
