DILI, 25 agostu 2019 (TATOLI)-Oitavu Governu Konstitusionál, tinan ne’e, aloka Orsamentu Jerál Estadu 2019 ho montante 1,2 millaun hodi realiza atividade komemorasaun tinan 20 Konsulta Populár iha 30 agostu.
Eventu komemorasaun tinan 20 Konsulta Populár ne’e hahú antes ona iha Munisípiu 12 inklui Rejiaun Administrativu Espesiál Oecuse Ambeno (RAEOA) hahú fulan maiu
Koordenadór jerál ba atividade 30 agostu, Virgílio Smith “Kranik” hateten atividade tomak hahú kedas iha maiu, ne´ebé hahú husi Lautem iha loron 31 jullu no ramata iha RAEOA iha 24 agostu.
“Agora atividade hotu kona-ba 30 de agostu Konsulta Populár nian konsentra de’it ona iha Dili tanba atividade iha Munisípiu sira ramata ona iha RAEOA loron 24 agostu”, informa Koordenadór, Virgílio Smith ba jornalista sira iha Sentru Konvensaun Dili (CCD-sigla portugés), domingu (25/08/2019)
Nia dehan, atividade hotu ne’ebé realiza ona iha fulan tolu liubá kotuk ne’e Governu fó apoiu orsamentu ho totál 1,2 millaun. Oras ne’e dadaun atividade sira ne’e la´o besik to’o ona nia rohan.
Orsamentu 1,2 millaun ne’e alende realiza atividade kulturál hodi anima populasaun iha territóriu Timor-Leste, osan ne’e mós konta hotu ona hodi selu viajen ba bainaka VIP (Very Importante Person) ne’ebé mai partisipa iha komemorasaun 30 agostu ne´e.
Entretantu, hahú husi loron 25 ba to’o 29 agostu ne’e, festival kulturál rezisténsia populár ne’e hala’o iha CCD no 30 agostu atividade sei konsentra hotu iha Tasitolu
Ne’e duni, eventu 30 agostu iha Dili ne’e loke husi reprezentante Primeiru-Ministru, Ministru Prezidenti Konsellu-Ministru, Hermenigildo Agio Pereira hodi fó biban ba komisaun atu kontinua atividade Festivál ne’e iha Dili.
Jornalista :Tomé Amado
Editór : Rafy Belo
