DILI, 25 agostu 2019 (TATOLI)-Ativista Australianu, Bernard Collaery, hakerek karta ba MKOTT (Movimentu Kontra Okupasaun Tasi Timor) no ba povu Timor-Leste (TL) nia apoiu no solidariedade relasiona ho akuzasaun Tribunál Austrália kona-ba nia ho Witness K, denunsia kamera espionajen, iha Palásiu Governu Timor-Leste.
“Ha´u orgullu tanba ajuda ona povu Timor-Leste hodi luta ba justisa. Ha´u sei kontinua ajuda imi hetan justisa mezmu iha prezekusaun ba ha´u-nia aan no Witness K sei kontinua,” hateten ativista Bernard Collaery iha nia karta diriji ba MKOTT, Ajénsia TATOLI asesu husi MKOTT, domingu (26/08/2019).
Ativista Bernard Collaery ho Witness K, Tribunál Austrália halo audiénsia iha loron 12 setembru 2018 relasiona ho kazu Timor ba delimitasaun fronteira marítima entre Timor-Leste ho Austrália.
Tanba ne´e, iha loron ida antes Bernard Collaery ho Witness K audiénsia iha Tribunál Austrália, MKOTT realiza konferénsia imprensa hodi ezije ba Austrália atu la kontinua aktu ne´e, tanba MKOTT konsidera hanesan réjime Suharto nian, hodi limita liberdade espresaun husi povu kona-ba sasán sira ne´ebé mak la´o la di´ak.
“Tanba ne’e deklarasaun ida ne’e, ami ezije ba Austrália katak tenke respeita direitu liberdade espresaun husi kolega Bernard Collaery no Witness K ninian tanba sira-nia direitu ba liberdade ida ne’e konsege hatuur tratamentu iguál entre Timor-Leste no Austrália,” deklara portavóz MKOTT, Juvinal Dias, ba jornalista sira liuhusi konferénsia imprensa, iha jardin Arkivu no Múzeu Rezisténsia Timor-Leste (AMRT), tersa (11/09/2018).
Hafoin konferénsia imprensa, MKOTT halibur asinatura solidariedade ba Bernard Collaery no Witness K, iha jardin Liceu, AMRT nian, hahú kuarta 12 to’o 13 setembru 2018, depois loron 14 iha Fundasaun Haburas nia oin, Palapasu no segunda, 17 semana oin MKOTT sei entrega mensajen solidariedade ne’e ba embaixada Austrália, nu’udar parte ida haruka ba governu Austrália.
Aktu mensajen solidariedade ne’e mós hanesan agradesimentu ida ba ativista Bernard Collaery no Witness K, ne’ebé ajuda ona Timor-Leste hodi ajuda no defende interese Timor-Leste nian , ne’ebé ikus mai hetan mós akuzasaun husi governu Austrália.
Asinatura solidariedade ba Bernard Collaery no Witness K ne’e mós nu’udar kontinuasaun husi atividade ne’ebé MKOTT halo ona durante ne’e hasoru governu Austrália.
Notísia Relevante:MKOTT: Kazu Bernard Collaery Ho Witness K Parte Integrante Husi Luta Fronteira Marítima
Jornalista : Rafy Belo
Editór : Francisco Simões
