DILI, 26 agostu 2019 (TATOLI)—Prezidente Parlamentu Nasionál, Arão Noé de Jesus da Costa Amaral, hateten Lei Reparasaun ba vítima iha funu importante ba Estadu Timor-Leste, maibé rezolve uluk lai problema veteranu nian.
“Iha tinan 2010 ami iha proposta lei ida mai hosi Governu atu ko’alia asuntu ne’e, maibé depois desizaun plenária nian hateten katak ita rezolve uluk lai problema ba veteranu sira, konklui tiha veteranu sira-nia problema depois mak ita ko’alia asuntu reparasaun ne’e, nune’e labele kahur. Ema Portugés ida dehan, di’ak liu ita ho viziñu ida di’ak duké maun-alin ida dook. Asuntu ne’e importante, maibé tenke haree faze ba faze”, dehan nia ba jornalista sira iha Parlamentu Nasionál, segunda ne’e.
Lee mós: Vítima Masakre Liquiçá Husu PN Hamosu Lei Reparasaun
Prezidente Parlamentu Nasionál ne’e konsidera relatóriu Comissão Acolhimento Verdade e Reconsilição (CAVR) ne’e asuntu polítiku, tanba ne’e tenke haree neneik, haree ba oin oinsá no projeta ba oin atu lori estabilidade.
“Ita-nia prinsípiu iha deklarasaun ne’e dehan CHEGA ka Tétun dehan ‘To’o ona’. Ita bele haree ba kotuk hodi haree akontesimentu sira iha pasadu maibé tenke hateke ba oin dehan katak buat sira ne’ebé akontese uluk labele akontese tan, entaun mai ita reflete ida ne’e”, nia esplika.
‘’Linguajen CHEGA ne’e luan tebes. Se ita interpreta didi’ak konteúdu tanbasá mak títulu ida desidi momentu ne’ebá ho nia naran CHEGA, tanba ho objetivu klaru mak ne’e, atu refleta ba kotuk, hodi hateke ba oin katak buat sira ne’ebé akontese iha pasadu labele akontese tan entre ita ho Indonézia. Tanba ne’e tenke haree malu hanesan viziñu. Asuntu ne’e mós sai prioridade ba Estadu Timor-Leste”, Arão tenik.
Jornalista: Evaristo Soares Martins
Editór: Xisto Freitas
