DILI, 26 agostu 2019 (TATOLI)-Ministru Obra Públika (MOP), Salvador Eugénio Soares dos Reis Pires, hatete Governu liuhosi grupu tékniku Komisaun Interministeriál hahú diskute espropriasaun ba implementasaun planu mestre ba projetu konstrusaun saneamentu no drenajen iha kapitál Dili.
Komisaun liña interministeriál ne’e, kompostu husi Ministériu Finansa, Ministériu Justisa ne’ebé prezide husi Ministériu Obra Públika (MOP), bazeia ba despaxu Primeiru-Ministru Taur Matan Ruak ho númeru 034/L/7/2019.
“Ita-nia komisaun interministeriál ne’e atu haree planu mestre no problema resentimentu projetu drenajen no saneamentu iha Dili atu rezolve impaktu ambientál no mudansa klimátika liuliu inundasaun ne’ebé kada tinan mosu iha kapitál Dili”, Ministru Salvadór, afirma hafoin abertura diskusaun grupu tékniku, iha Otél Novu Turizmu, ohin.
Ministru Salvador dehan kreximentu demográfiku iha Dili laran aas hahú husi 2005 to’o 2010 kuaze porsentu 1,5 no 2010 to’o 2015 ho porsentu 15 no daudaun ne’e tun ba porsentu 9-resin tanba ho konstrusaun barak entaun área ba bee atu halai menus ba beibeik.
Tanba ne’e, nia salienta projetu ba sistema drenajen no saneamentu ne’e importante atu hamenus inundasaun no kria ambiente ne’ebé saudavel ba abitante tomak iha sidade Dili.
Ministru Obra Públiku ne’e adianta projetu ne’e rasik iha faze finál ba planu mestre no dezeñu detalladu ne’ebé mak hala’o husi Água de Portugál (AdP) no Governu mós halo ona kustu estimativu no hahú tama ona faze preparasaun ba prosesu resentimentu.
Liuhosi Planu Mestre, Ministru Salvadór dehan Governu halo planu sektorál sira atu rezolve infraestrutura bázika drenajen sira atu akumula udan-been ho mós problema ambientál no mudansa klimátika hodi hapara inundasaun.
“Se ita laiha planu sektorál sira sei fó impaktu fíziku ba ita-nia sidade no kria moras oin-oin ne’ebé fó impaktu saúde ba komunidade iha kapitál Dili”, katak.
Projetu ne’e, nia dehan hanesan planu asaun ida atu atinje meta Planu Estratéjiku Dezenvolvimentu Nasionál (PEDN) 2011 to’o 2030 ne’ebé Timor-Leste nia populasaun sai prósperu, saudavel, seguru no forte.
Iha fatin hanesan, Diretór Nasionál Servisu Água no Saneamentu, Gustavo da Cruz, dehan enkontru tékniku diskute problema fundamentál oinsá atu implementa planu mestre no ba komunidade afetada sira atu sira husik projetu saneamentu no drenajen.
Estudu planu mestre saneamentu no drenajen iha kapitál Dili husi konsultór Austrália hahú iha 2011 no 2012 no iha 2013 to’o 2017 hala’o ona melloramentu planu ba kanál drenajen sira iha kapitál Dili, iha tinan ne’e (2019) iha faze finál atu estudu impaktu ambientál no planu saneamentu iha kapitál Dili atu hahú konstrusaun iha tinan 2020.
“Ita-nia prioridade ida ne’e ate 2025 sei bele atinje ita-nia objetivu no finansiamentu ne’e husi ita-nia kanál drenajen husi doadór Millennium Challenge Corporation (MCC) no atu apoiu ita iha bee no saneamentu iha Dili,” akresenta.
Kustu estimasaun ba planu mestre ba implementasaun projetu drenajen no saneamentu iha Dili ne’e kuaze millaun $2-resin.
Reuniaun interministeriál ne’e partisipa husi Diretór Jerál Água no Saneamentu (DGAS), Gustavo da Cruz, ho diretór nasionál sira, Komandante PNTL munisípiu Dili, Superintendente Xefe, Armando Monteiro, inklui diretór sira husi ministériu relevante.
Jornalista: Florencio Miranda Ximenes
Editora : Maria Auxiliadora
