DILI, 26 agostu 2019 (TATOLI)-Ministru Obra Públika (MOP), Salvador Eugénio Soares dos Reis Pires, orienta ekipa interministeriál atu halais prosesu identifikasaun propriedade abitante ne’ebé afetada ba konstrusaun estrada iha parte Rotunda Komoro to’o Tasitolu.
“Espropriasaun ba komunidade iha área Rotunda Komoro ne’e urjente uitoan ne’ebé presiza apoiu husi ministériu relevante sira atu realiza espropriasaun hodi fó fatin ba kompañia konstrui estrada”, Ministru Salvador ba jornalista sira iha Otél Novo Turizmu, ohin.
Nia dehan Governu iha responsabilidade tenke prepara kondisaun infraestrutura estrada, molok portu Tibar ne’e tama iha operasaun iha 2021.
“Kuandu portu ne’e tama iha operasaun infrastrutura ne’ebé tama iha akordu ne’e Governu tenke prepara, prontu ona ba sustenta operasaun portu Tibar nian, entaun ida ne’e urjente uitoan, se lae Governu kona koima rihun $50 kada loron”, katak.
Tanba ne’e, nia husu ba ekipa Ministériu Obra Públiku ho ministériu relevante sira para haree no rezolve prosesu resentimentu para kompañia sira bele tama halo konstrusaun estrada iha rotunda Komoro to’o Tasi-Tolu.
“Ita-nia populasaun lubuk ida ne’ebé ne’ebé afetada, tuir lei Governu iha devér atu halo resentimentu espropriasaun ba ita-nia komunidade sira ne’ebé hela besik estrada ninin”, katak.
Antes ne’e, Diretór Jerál Ministériu Obra Públiku, Rui Hernani, informa estudu preliminár finaliza ona, maibé presiza tan forma ekipa ministeriál atu hala’o identifikasaun ba asset abitante sira.
Ekipa ministeriál ne’e envolve husi Ministériu Obra Publika (MOP), Ministériu Justisa, Ministériu Administrasaun Estatál, Ministériu Agrikultura no Peska (MAP), Prezidente Autoridade Munisípiu Dili, Administradór Postu Administrativu no Xefe Suku sira
“Ami sei halo hela identifikasaun ba propriedade, bens abitante ne’ebé afeta hodi hala’o pagamentu, molok muda sira husi fatin ne’e”, Diretór Jerál MOP ba Ajénsia Tatoli, iha kna’ar fatin Faról, segunda (22/07).
Tanba ne’e, nia dehan MOP kontinua halo negosiasaun ho abitante kuaze 200-resin ne’ebé afeta ba haluhan estrada trosu Tasitolu to’o Rotunda Komoro hodi haree ba propriedade abitante liuliu uma no ai-horis inklui asset sira.
Iha estudu preliminár, Diretór Jerál MOP dehan deteta kuaze rai ne’ebé abitante sira hela ne’e rai Estadu hotu, maibé abitante sira iha ona asset ne’ebé presiza fó kondisaun.
Estrada trosu Tasitolu to’o Rotunda Komoro ne’e, nia dehan kuaze kilómetru rua hamutuk ho pakote estrada trosu Tibar to’o Tasitolu ne’ebé ka’er husi kompañia internasionál China Wuyi ho kustu millaun $12-resin, hahú iha loron 28 fevereiru 2017 to’o outubru 2019.
Notísia relevante : Governu Sei Forma Konsellu Interministeriál Hodi Identifika Propriedade Abitante Tasi-Tolu-Rotunda Komoro
Governu Sei Halo Estudu Viabilidade Atu Muda Komunidade Rotunda Komoro-Tasitolu
Jornalista : Florencio Miranda Ximenes
Editora : Maria Auxiliadora
