DILI, 27 agostu 2019 (TATOLI) – Jerasaun Dom Boaventura Promove Tais lulik “Kasto Mutin”, iha eventu Festivál Kultura Rezisténsia Populár (FKRP), iha Sentru Konvensaun Dili (CCD-sigla inglés).
Tais Kasto Mutin konsidera lulik husi reinu Manufahi tanba Dom Boaventura hatais hodi funu hasoru kolonializmu Portugés iha Manufahi. Tais ne’e mós konsidera iha valór místiku tanba tais ne’e pertense de’it ba uma lisan Mausala Malimau husi Dom Boaventura nian.
Koordenadora Grupu soru Tais Samalenol husi Munisípiu Manufahi, Natalia Seizas esplika katak maske to’o ohin loron istória místika kona-ba Tais Kasto mutin ne’e sira nunka rona maibé jerasaun sira kontinua hakru’uk bandu ne’ebé beiala sira husik hela atu nafatin konsidera sasán hotu ne’ebé mak pertense ba Avo Dom Boaventura nian.
“Ami dezde tempu Portugés kuandu Avo Dom Boaventura lakon funu no mós lakon iha rai Manufahi to’o ohin loron. Tais ne’e mós konsidera lakon hotu ona tanba laiha lisensa atu ninia jerasaun sira kontinua promove avo nia hatais sira ne’e,” hateten Koordenadora Natalia Seizas ba jornalista Ajénsia TATOLI, iha Sentru Konvensaun Dili (CCS-sigla portugés), tersa (27/08/2019).
“Maibé depois kuandu Timor-Leste manán funu hodi ukun rasik aan foin mak hetan lisensa husi uma lisan Dom Boaventura nian atu jerasaun sira bele koñese sasán lulik sira ne’ebé avo uza iha tempu ne’ebá,” nia haktuir.
Ne’e duni, hanesan jerasaun foun, Koordenadora Natalia entuziazmu liu ba Tais Kasto Mutin ne’e ho hanoin ida atu promove fila fali tais origin ne’e atu keta lakon. Iha 2015 kuandu nia harii grupu Samalen nian motif dahuluk nia foti mak Baria funan ne’ebé mak hanaran Kasto Mutin.
Nia dehan maske agora sira hahú promove ona maibú la foti hotu ninia orijen tanba Tais orijen mai husi natureza difisil atu halo tuir.
Ninia modelu no koris hanesan maibé ninia tempra mak laiha ema ida hatene. Maibé pelumenus bele promove ona no jerasaun ohin kuandu haree rezultadu husi Tais Kasto Mutin ne’e sira haksolok tebes
Nune’e mos iha tais seluk mak hanesan Tais Metan (dom metan) bele hatais ba serimónia kulturál uma lisan no Tais matak uza ba serimónia tara bandu no saubatar.
Entertantu, husi aprezentasaun konkursu soru Tais ne’e Grupu ne’e lori Motif Baria funan husi hatais Dom Boaventura nian no sira rasik garante katak Tais ne’ebé sira soru iha duni ninia kualidade tanba kabas ne’ebé uza liu ona husi teste manuál ne’ebé hoban ona ho ai-ben depois maran tiha hahú fase fila fali hodi hatene ninia kualidade.no ninia rezultadu kabas sira ne’e la malahuk.
Notisia relevante:Grupu Artezanatu Lima Kompete Iha Eventu FKRP
Jornalista : Tome Amado
Editór : Rafy Belo
