DILI, 26 agostu 2019 (TATOLI)-Komandante Komandu Operasionál Nasionál (KKON) Polísia Nasionál Timor-Leste (PNTL), Superintendente Xefe, Pedro Belo, dehan PNTL sei halo koordenasaun ho Ministériu Públiku atu haree fila fali prosesu kazu oho vítima Vera Carvalho Martins.
Notísia Relevante : Kazu Oho Vera, Tribunál Absolve Arguidu Na’in Haat
Pedro Belo dehan polísia rasik ‘hakfodak’ bainhira rona desizaun Tribunál Distritál Dili (TDD) hodi absolve arguidu na’in haat ne’ebé akuzadu ba kazu oho vítima Vera Carvalho Martins iha area Kristu Liurai hodi ba hakoi subar iha area Subaun, Munisípiu Manatutu.
“Ita sei halo fila fali konfirmasaun hodi husu ba Ministériu Públiku tanba saida maka kazu ne’e sai nune’e. Tanba kazu ne’e na’in ba prosesu mak Ministériu Públiku no ami polísia ajuda de’it,” esklarese Pedro Belo, hodi responde jornalista iha Akademia PNTL, Komoro.
Notísia Relevante : Kazu Oho Vera, Defeza Sei Halo Asaun Sivíl Kona-ba “Bom Nome”
Hataan kona-ba prosesu autópsia ba mate isin ne’ebé parte Ospitál Nasional Guido Valadares (HNGV-sigla portugés) halo identifikasaun katak, kadaver ne’ebé diskonfia mate isin Vera ne’e la’ós Vera, Komandante Pedro Belo, lia tun dehan, sira sei koordena mós ho parte Polísia Nasionál Servisu Investigasaun Kriminál (PNSIK).
“Ida ne’e mós ita sei konfirma fila fali,” tenik eis Komandante PNTL Munisípiu Dili ne’e.
Notísia Relevante : Rezultadu Autópsia, Matebian Vera Hetan Taa Ho Sasán Kro’at
Jornalista : Eugénio Pereira
Editór : Francisco Simões
