PNTL Bobonaro Rekoñese Dedikasaun Ian Martin
BOBONARO, 28 agostu 2019 (TATOLI)-Adjuntu Komandante Polisia Nasionál Timor-Leste (PNTL) Munisípiu Bobonaro, João da Costa, rekoñese dedikasaun tomak husi Eis Xefe United Nations Mission in East Timor (UNAMET-sigla Inglés), Ian Martin, tanba realiza eleisaun iha 30 Agostu 1999 ho susesu.
João da Costa hato’o ninia observasaun pesoál ne’e bainhira simu vizita husi Eis Xefe UNAMET, Ian Martin, Tersa (27/08/2019) iha Munisípiu Bobonaro.
Komandante ne’e relembra iha tinan 1999 povu Timor-Leste hasoru situasaun ida difisil tanba hetan intimidasaun no ameasa oi-oin husi grupu pro-autonomia, maibé Eis Xefe UNAMET ne’e kontinua dezafia Timoroan hotu atu deside sira ninia diretu liuhosi eleisaun ba ukun rasik aan.
Aproveita okaziaun ne’e, Komandu PNTL Bobonaro hato’o sira nia agradesimentu profunda ba Ian Martin tanba fó ona kontribuisaun ba Povu Timor Leste ba auto determinasaun rasik.
Objetivu husi vizita ne’e, atu haree fila fali situasaun dezenvolvimentu hodi kompara ho tinan 20 liubá bainhira lidera misaun UNAMET hodi realiza konsulta populár iha 30 agostu 1999.
Jornalista : Domingos Piedade Freitas
Editór : Francisco Simões
