DILI, 30 agostu 2019 (TATOLI)-Primeiru-Ministru (PM), Taur Matan Ruak, hatete Timor-Leste hahú kapítulu foun ida kona-ba relasaun bilaterál entre nasaun rua, Timor-Leste no Austrália.
“Momentu ida ne’ebé hatudu ita-nia vontade mútua ne’ebé firmi atu alkansa akordu ida justu no ekuitativu, hafoin prosesu negosiasaun nian ne’ebé la’o ho susesu, ne’ebé ba dala uluk mak utiliza mekanizmu konsiliasaun sira, ne’ebé prevee iha Konvensaun Nasaun Unida kona-ba Direitu Tasi nian (UNCLOS)”, PM Taur afirma iha serimónia ofisiál troka “Nota Diplomátika” kona-ba ratifikasaun Tratadu Fronteira Marítima (RFM) iha Tasi Timór, iha Palásiu Governu, ohin.
Tanba ne’e, maka ho orgullu boot Timor-Leste marka entrada iha vigór tratadu ida-ne’e nian, iha nasaun rua ne’e, hanesan ezemplu di’ak ida ba Mundu, kona-ba oinsá rezolve konflitu ho dame, ho forma kooperativa no kolaborativa. Austrália no Timor-Leste fahe lisuk prinsípiu no valór fundamentál sira-ne’ebé hanesan kona-ba Direitu Internasionál no Direitu Umanu nian.
“Relasaun di’ak, besik no pozitivu ida-ne’e, eziste nafatin durante tinan barak iha nivel bilaterál, liuhosi kooperasaun iha domíniu hotu-hotu ne’ebé sai hanesan interese komún, liuliu iha defeza no seguransa, iha saúde no edukasaun no iha fortalesimentu sosiedade sivíl, liuliu iha lasu sidadania sira nian. Maski ita-nia relasaun metin tebetebes, ha’u hakarak hato’o ba Vosa Exelénsia, señór Primeiru-Ministru, ami-nia kompromisu firme atu investe tempu no esforsu maka’as liután, atu habelar no hametin ita-nia relasaun iha nivel hotu-hotu, hodi hatán tuir ita-nia povu sira ninia espetativa”, PM Taur salienta.
Xefe Governu ne’e dehan espíritu husi Tratadu Fronteira Marítima permanente ida-ne’e sai hanesan fonte inspirasaun no enkorajamentu ida, ne’ebé fó aten-boot mai ami atu la’o bá oin.
“Ha’u fiar katak espíritu ida-ne’e sei ajuda duni ita-nia Governu rua hodi serbisu ho empeñu foun, tantu bilaterál no mós kooperativu, ba ita-nia rain nia di’ak no ba ita-nia populasaun sira-nia moris-di’ak. Ami fiar katak Austrália no Timor-Leste serbisu hamutuk nafatin, nune’e bele kumpre, ho dalan ne’ebé prátiku liu no dilijente liután, ita-nia Povu rua ne’e ninia hakarak no aspirasaun loloos”.
Troka Nota Diplomátika ne’e husi Primeiru-Ministru, Taur Matan Ruak, ho PM Austrália, Scott John Morrison, iha Palásiu Governu, loraik ne’e.
Notísia relevante : Troka Nota Entendimentu Entre TL-Austrália Realiza iha Palásiu Governu
Jornalista : Florencio Miranda Ximenes
Editora : Maria Auxiliadora
