DILI, 04 setembru 2019 (TATOLI)-Fakuldade Direitu, Universidade Nasionál Timor Lorosa’e (UNTL) ho inisiativa hamosu semináriu ho tema “Direitu Autodeterminasaun” hodi koñesimentu ekstra estudante sira nian.
Prezidente Komisaun Organizadora (KO), Constantino de Jesus hateten katak semináriu ne’e realiza atu jerasaun foun sira ne’e hamahan aan iha UNTL, Fakuldade Direitu bele iha liután koñesimentu kona-ba istória luta libertasaun nian.
“Tema sentrál ne’ebé fakuldade foti ne’e, atu gaña koñesimentu tanba loron Konsulta Populár ida ne’e mak momentu importante ba povu timoroan tomak deside ukun aan ka autonomia. Ho nune’e mak Fakuldade hakarak kria ideia konstrutiva hodi ajuda jerasaun foun sira atu hateke ba oin,” hateten Prezidente Komisaun, Constantino de Jesus ba Ajénsia TATOLI, iha Kampus Sentrál, UNTL, ohin.
Iha biban hanesan, Xefe KO ne’e espera katak liuhusi semináriu ne’e estudante ensinu superiór públiku inkluzivamente Fakuldade Direitu bele aproveita ideia konstrutiva ne’ebé hato’o husi oradór sira.
Oradór ba semináriu ne’e mak Sekretáriu Jerál FRETILIN (Frente Revolucionário de Timor-Leste Independente), Marí Alkatiri no mós Eis-Ministru Defeza no Seguransa, Roque Rodriguês. Oradór sira ne’e konvida husi Estudante Fakuldade Direitu, UNTL rasik.
Notísia relevante:Konsulta Populár Hanesan Konkluzaun Husi Luta
Jornalista: Tomé Amado
Editór : Rafy Belo
