DILI, 10 setembru 2019 (TATOLI)-Vise-Ministru Edukasaun Juventude no Desportu, João Zacarias, hateten Ministériu Edukasaun Juventude no Desportu (MEJD) durante 2018-2019 fó ona apoiu emerjénsia ba Eskola Ensinu Báziku 12 ne’ebé afetadu husi dezastre naturál, atu fasilita estudante sira kontinua simu matéria ho di’ak.
“Ministériu Edukasaun fó apoiu emerjénsia ho urjente tanba fulan oin labarik sira tenke partisipa ona iha ezame nasionál no lokál. Entaun apoiu ida ne’e atu tulun labarik sira atu kontinua simu nafatin matéria ho avontade,” dehan Vise-Ministru Edukasaun Juventude no Desportu, João Zacarias, ba jornalista sira iha ninia Gabinete MEJD, Vila Verde, Dili, tersa (10/09/2019).
Eskola sira ne’ebé simu apoiu, nia hatutan, mak hanesan iha tinan kotuk ministériu imediatamente fó apoiu materiál hanesan kalen, ai no pregu ba eskola Ensinu Báziku iha Mologen Bobonaro, Ainaro, Baucau no Viqueque ne’ebé hetan estragu impaktu husi anin-boot.
Iha semana kotuk, nia informa, Ministériu Edukasaun Juventude no haruka tan apoiu materiál hanesan ba Eskola Ensinu Báziku iha Postu Administrativu Quelicai, Suku Abu no Waitame área Namanei nian ne’ebé hetan estragu.
“Materiais sira ne’e Ministériu ajuda maibé husu apoiu inan-aman sira-nian atu kontribui hodi rekopera fali kondisaun eskola sira ne’e. Ministériu Edukasaun la selu maibé ho voluntáriu inan-aman sira mak serbisu hodi hadi’a fali eskola sira ne’e,” nia dehan.
Enkuantu, iha fatin hanesan, Diretor Nasionál Asuntu Sosiál Eskolar (DNASE), Belchior Maria Barros relata katak iha tinan ida ne’e, iha Eskola Ensinu Báziku tolu (3) iha Dili no Manufahi hetan mós estragu.
Husi eskola rua ne’e, nia orienta ona Diretór eskola iha Postu Alas, Suku Manek atu halo relatóriu inklui hasai ho foto kondisaun eskola refere atu nune’e DNASE bele fó apoiu tuir volume gravidade ne’ebé iha.
Nia afirma katak normalmente apoiu emerjénsia ba eskola sira ne’e mai husi orsamentu 2017 ho montante $40 mil.
“Agora dirasaun ninia osan hotu ona ho apoiu materiais ne’ebé mak ikus ho ajuda ba eskola rua iha Baucau nian. Ita mós durante ne’e hetan apoiu husi UNICEF. Maibé, agora stock materiais hotu ona entaun dirasaun tenke halo fali proposta hodi hetan apoiu,” nia hateten.
Notísia relevante:Semana Rua Kotuk, Anin Boot Sobu Uma 30
Jornalista : Tomé Amado
Editór : Rafy Belo
