DILI, 10 setembru 2019 (TATOLI)—Konsellu Administrasaun Parlamentu Nasionál, hahú halo análize ba orsamentu privativu Parlamentu nian.
‘’Ami simu hosi governu millaun $14 ba de’it verba serbisu, saláriu vensimentu, bens no serbisu ho transferénsia. Ba verba kapitál menór no kapitál dezenvolvimentu governu la fó. Ne’e katak sei nakloke para bele tau, liliu kapitál dezenvolvimentu’’, Prezidente Parlamentu Nasionál, Arão Noé de Jesus da Costa Amaral, ba jornalista sira, iha Parlamentu Nasionál (PN), tersa ne’e.
Prezidente PN ne’e seidauk bele hateten númeru loloos, tanba Konsellu Administrasaun aprova mak bele fó-sai no presiza haree didi’ak atu haree prioridade sira, sira ne’ebé la prioridade, bele elimina dadaun iha Konsellu Administrasaun. Tanba ne’e mak iha hela faze análize hosi Konsellu Administrasaun Parlamentu nian maibé desizaun finál sei aprova liuhosi plenária.
‘’Bele hatún ka bele hasa’e, depende plenária nia desizaun, tanba orsamentu privativu tenke aprova liuhosi plenária’’, katak nia.
Arão salienta, Parlamentu husu estensaun to’o 25 setembru mak bele hatama orsamentu privativu Parlamentu nian ba Governu.
‘’Kona-ba sufisiente ka lae, ne’e mak ami haree hela ne’e. Governu fó númeru ida ne’e, ami halo análize. Se liu uituan karik, ami sei justifika tanbasá mak hasa’e’’, dehan Prezidente Parlamentu Nasionál.
Jornalista: Evaristo Soares Martins
Editór: Xisto Freitas
