DILI, 10 setembru 2019 (TATOLI)-Governu liu husi Ministériu Interiór, Sekretáriu Estadu Protesaun Sivíl ho Komandu Polisia Nasionál Timor-Leste (PNTL) hahú enkontru hodi halo justifikasaun ba proposta tetu Orsamentu Jerál Estadu (OJE) 2020.
Notísia Relevante : PNTL Ezekuta Ona OJE 2019 Too 59.3%
Enkontru ne’ebé hala’o iha salaun Ministériu Interiór, Vila-Verde, Dili, ohin, lidera husi Ministru Interior Interinu Brigadeiru Jenerál, Filomeno da Paixão de Jesus, akompaña husi Sekretáriu Estadu Protesaun Sivíl, Alexandrino Xavier Araújo, ho Komandante Jerál PNTL Komisáriu Polisia Faustino da Costa, no diretór sira inklui tékniku sira.
Ministru Filomeno dehan, enkontru ne’e importante, tanba Primeiru Ministru, Taur Matan Ruak iha segunda ne’e prezide Reuniaun Komité Revizaun Orsamentu 2020 ba-dahuluk hamutuk ho Membru Komisaun Revizaun Orsamentu Polítika (KROP) hodi simu audiénsia husi Ministériu, Instituisaun Estadu no Ajénsia Públikas Autónoma hodi rona no tetu sira nia proposta hodi hetan konsiderasaun finál ba iha OJE 2020.
Tuir oráriu ne’ebé Komisaun Revizaun Orsamentu Polítika (KROP) deside ona Ministériu Defeza hamutuk ho Komandu FALINTIL-Forsa Defeza Timor-Leste (F-FDTL), Institutu Defeza Nasionál (IDN), Servisu Nasionál Intelijénsia (SNI), Ministériu Interiór no Komandu PNTL sei aprezenta proposta diskusaun ho KROP iha loron segunda 13 Setembru agora.
Totál OJE 2019 ba Ministériu Defeza orijen $1.480,252,263.00, Kompromisu sira $118,477,620.89, Obrigasaun sira $94,360,306.44,Atuál, $688,854,925.12, Saldu $578,559,410.55 no Ezekusaun too ona 52.9%.
Nune’e mós OJE 2019 ba F-FDTL ho orijen $21,911,690.00, Kompromisu sira $2,173,240.94, Obrigasaun Sira $2,172,902.84, Atuál, $12,253,331.63, Saldu $5,312,214.59 no Ezekusaun too ona 65.8%.
OJE 2019 ba Ministériu Interior ho orijen $1,480,252,263.00, Kompromisu sira, $118,477,620.89, Obrigasaun sira, $94,360,306.44, Atuál, $688,854,925.12, Saldu $578,559,410.55, Ezekusaun too ona 52.9%
OJE 2019 ba PNTL ho orijen $34,341,878.00, kompromisu sira $3,005,961.29, Obrigasaun sira, $2,081,450.00, Atuál, $18,502,372.62 Saldu $10,750,093.31 Ezekusaun too ona $59.9%.
Jornalista : Eugénio Pereira
Editór : Francisco Simões
