DILI, 11 setembru 2019 (TATOLI) – Ministru Estadu Prezidénsia Konsellu Ministru, Hermenegildo Augusto Cabral Pereira, informa reuniaun Konsellu Ministru (KM) iha kuarta ne’e, fó poder tomak ba Ministru Justisa, Manuel Cárceres, hodi asina akordu iha área justisa.
“Ministru Justisa simu poder tomak atu asina akordu entre Universidade Coimbra, Portugal no ita nia Ministériu Justisa, hanesan kooperasaun akadémika sientífika kulturál, hodi tulun formasaun majistradu sira nian, defensor públiku, lisensiadu direitu iha Timor-Leste”, nia tenik ba jornalista sira iha Palásiu Governu.
Biban ne’e, Ministru Justisa aprezenta mós proposta deliberasaun ba alterasaun protokolu kooperasaun entre Ministériu Justisa Timor-Leste no ho Portugal iha área justisa nian, ne’ebé asina iha 25 fevereiru 2016.
Proposta deliberasaun ne’ebé aprovadu ne’e, atu halo mudansa ba kritériu husi renumerasaun liuliu ba kontratasaun téknika apoia finansiamentu judisiál, asesória no kapasitasaun rekursu umanu.
Alterasaun ba protokolu kooperasaun sei asina iha 17 setembru 2019.
“Kooperasau seluk entre Ministériu Justisa Portugal no Timor-Leste, iha ámbitu komplementar dezenvolvimentu setór justisa, maibé foku iha direitu umanu no direitu fundamentál sidadaun sira nia”, nia akresenta.
Ministru Justisa, Manuel Cárceres aprezenta mós proposta Rezolusaun Governu, ne’ebé antes ne’e aprova iha KM, kona-ba autorizasaun akizisaun arma fogu ba servisu pesoál Polítika Sientífika Investigasaun Kriminál (PCIC-sigla portugués) korpu superior Polísia Kriminál, ne’ebé hanesan misaun hodi servisu hamutuk ho autoridade judisiária, dezenvolve no promove asaun prevensaun, detensaun, no investigasaun.
Nune’e, bele asegura sentralizasaun nasionál informasaun kriminál no respetiva koordenasaun operasionál no kooperasaun Polísiál.
Jornalista: Julia Chatarina
Editór: Xisto Freitas
