DILI, 13 setembru 2019 (TATOLI) – Prezidente Parlamentu Nasionál (PPN), Arão Noé de Jesus da Costa Amaral, hateten Parlamentu Indonézia nian konkorda hodi aselera delimitasaun fronteira terreste no marítima entre Timor-Leste (TL) ho Indonézia.
Arão Noé ko’alia asuntu ne’e hafoin simu vizita kortezia husi Vise Prezidente Parlamentu Indonézia, Fadli Zon, iha Parlamentu Nasionál (PN)
Iha enkontru ne’e, PPN husu pozisaun Fadli Zon kona-ba kestaun delimitasaun fronteira entre nasaun rua ne’e.
Notísia Relevante: TL-Indonézia Konkorda Finaliza Àrea Naktuka
“Sira kompromete atu apoia delimitasaun fronteira marítima ne’ebé ita konklui tiha ona ho Austrália, hein katak iha tempu badak bele mós konklui tiha delimitasaun tasi nian entre Timor-Leste ho Indonézia, no bele rezolve tuir lei internasionál ninian”, tenik Arão Noé ba jornalista sira, iha PN, sesta ne’e.
Nune’e mós, PPN akresenta, ba delimitasaun fronteira terrestre ne’ebé sei hela pontus rua ne’ebé foin asina tiha ona mais presiza ratifikasaun atu nune’e bele afirma konkreta no legaliza tiha.
“Ho situasaun ne’e, sira konkorda no apoia oinsá prosesu bele la’o lalais”, nia subliña.
Antes ne’e, Xefe Negosiadór Prinsipál, Xanana Gusmão ho Ministru Koordenadór ba Asuntu Polítika no Defeza Repúblika Indonézia, Wiranto no Ministra Negósiu Estranjeiru Repúblika Indonézia, Retno Marsudi, asina ona nota prinsípiu aseitasaun ba finalizasaun fronteira terrestre.
Liuhosi asinatura aseitasaun ne’e finaliza ona fronteira terrestre iha segimentu rua hanesan Noel Besi-Citrana no Bijael Sunan–Oben.
Área Fronteira Noelbesi Citrana hanesan fronteira entre Kupang, Nusa Tenggara Timur no Ambeno (Oé-cusse), ne’ebé hanesan área husi Timor-Leste.
Nune’e mós Bijael Sunan-Oben hanesan fronteira Timur Tengah Utara ne’ebé sai parte husi Indonézia no Oé-cusse, ho medida hektar 142,7.
Jornalista: Evaristo Soares Martins
Editór: Xisto Freitas
