DILI, 26 setembru 2019 (TATOLI) – Ministru Defeza no Seguransa, Filomeno da Paixão de Jesus, hateten agora dadauk ekipa jurizta no tékniku ne’ebé forma husi ministériu hamutuk ho Konsellu Ministru hahú diskute kona-ba patrullamentu marítima.
“Patrullamentu la’ós de’it halo iha marítima maibé mós patrullamentu aériu no agora haree hela modalidade ne’ebé klaru no di’ak liu. La’ós de’it modalidade maibé tenke haree mós ba lejizlasaun konaba-ba lei, ema ilegál iha tasi ita mak kaer ka Austrália mak kaer”, tenik ministru ba jornalista sira hafoin hasoru malu ho Primeiru-ministru (PM), Taur matan Ruak, iha Palásiu Governu, kinta ne’e.
Notísia Relevante: Ministru Defeza Halo Hela Análize Ba Autoridade Marítima
Nia hatutan: “Ita tenke iha lei ida hodi autoriza kaer no kanaliza sasan ne’ebé mak ita hadau. Tanba ne’e la’ós lalais hanesan ita hanoin ne’e”.
Biban ne’e, governante ne’e informa hasoru malu ho Xefe Governu hodi relata ninia enkontru ho Ministra Defeza Austrália, Linda Reynolds.
Austrália hakarak servisu hamutuk ho Timor-Leste iha parte patrullamentu marítima liliu kontrolu iha Kosta Súl.
“Ita hanoin Ministra Defeza Austrália ko’alia hakarak komesa iha dezembru maibé ita haree lai lejizlasaun ne’e la’o oinsá, hafoin ita bele atua”, nia akresenta.
Antes ne’e, Ministru Filomeno hamutuk ho empreza Damen Shipyards no Pan Union Corporation halo ona aprezentasaun ba Konsellu Ministru kona-ba proposta akizisaun ró patrulla marítima no ekipamentu ró nian ho objetivu atu garante patrullamentu ne’ebé efetivu ba área kosteira nasionál nian no hatán ba situasaun emerjénsia no dezastre.
Jornalista: Julia Chatarina
Editór: Xisto Freitas
