DILI, 02 outubru 2019 (TATOLI) – Ministériu Públiku (MP) liu husi prokuradór titular, Afonso Tavares, ohin, informa, MP submete ou hato’o ona rekursu ba Tribunal primeiru instánsia kona-ba desizaun absolve arguido nain haat ne’ebé deskonfia envolve iha kazu ‘oho’ vítima Vera Carvalho Martins.
Notísia Relevante : Kazu Oho Vera, Tribunál Absolve Arguidu Na’in Haat
Tuir informasaun, too oras ne’e defeza husi arguido na’in haat seidauk simu notifikasaun husi tribunal primeiru instánsia kona-ba prosesu refere, entaun prosesu ne’e seidauk submete ba tribunal rekursu atu halo analiza.
Notísia Relevante : Kazu Oho Vera, PNTL Sei Halo Konfirmasaun
“Prosesu ne’e primeiru liu husi Tribunal primeiru instánsia (Tribunal Distritál Dili), husi sira mak notifika defeza atu simu rekursu ka halo kontestasaun, entaun husi ne’e mak ami sura prazu loron 15 nia laran ba Tribunal Rekursu atu analiza prosesu totál,” esplika Prokuradór Afonso Tavares, ba Ajénsia TATOLI iha Tribunal Distritál Dili (TDD).
Prokuradór titulár ba kazu Vera ne’e husu atu Tribunal primeiru instánsia atu prosesa ho lais nune’e kuandu notifika ona atu ativa prazu hatama prosesu ba Tribunal Rekursu fó sai rezultadu.
Jornalista : Domingos Piedade Freitas
Editór : Francisco Simões
