DILI, 02 outubru 2019 (TATOLI) – Atu fó kbiit liu tan ba Komisaun Anti Korrupsaun (CAC-sigla portugés) iha nia serbisu kombate korrupsaun, eis Prokuradora Angelita Pires, hateten, urjénsia no importante tebes atu aselera ona diskusaun no aprovasaun Lei Anti Korrupsaun iha Parlamentu Nasionál (PN).
Notísia Relevante : CEPAD Preokupa PN Adia Beibeik Lei Antí Korrupsaun
Angelita Pires hatutan, la iha razaun atu polítiku sira iha Parlamentu Nasionál dada tempu ka halo manobra atu ‘konjela’ Lei Anti Korrupsaun tanba de’it interese polítika.
“Se Parlamentu Nasional liu husi deputadu sira dehan tenke hein lai, entaun fila fali ba Ministériu Justisa hodi aumenta artigu ida ka rua iha kódigu prosesu penal, nune’e bele iha baze legal hodi julga korruptór sira,” hateten Angelita Pires, ohin, bainhira dada lia ho jornalista Ajénsia TATOLI iha Tribunal Distritál Dili (TDD).
Notísia Relevante : Diskusaun Ba Projetu Lei Anti Korrupsaun La’o Hela
Nia hatutan, konsekuénsia husi polítika PN hodi adia bei-beik aprovasaun ba Lei Anti Korrupsaun, maka difikulta KAK atu hala’o nia knar no deveres hodi bele kombate korrupsaun iha rai laran.
Notísia Relevante : Tempu Badak, PN Aprova Lei Anti Korrupsaun
Tuir Angelita Pires nia haree katak, KAK nia serbisu durante ne’e di’ak tebes, liuliu halo edukasaun sívika ba entidade sira kona-ba prevensaun korrupsaun no partilla informasaun kona-ba konsekuénsia ba povu ho Estadu bainhira nasaun ida moris iha korrupsaun.
Jornalista : Domingos Piedade Freitas
Editór : Francisco Simões
