DILI, 06 outubru 2019 (TATOLI)- Grupu Produtór Filme Lokál, Campis Filmmakers mak sai vensedór ba kompetisaun Dili Internasionál Festivál Filme (DIFF) ho títlu filme Luta ba Futuru.
Grupu Campis Filmmakers ne’e sente haksolok no orgullu tebes tanba bele sai primeiru lugar iha kompetisaun DIFF ne´e.
“Sente haksolok, orgullu no agradese ba José Ramos Horta, Embaixadora Amérika USA Kathleen Fitzpatrick. Agradese tebes ba sira tanba halo eventu ida ne’e,” dehan Produtór Filme, José Maria de Fátima Amaral Moniz ba jornalista sira iha Sentru Benfica, sábadu ne’e.
“Ida ne’e motiva maka’as ami atu nafatin luta kontinua ba dezenvolvimentu iha Timor-Leste,” kompromete produtór filme timoroan ne´e.
Nia informa, Campis Filmmaker rasik iha vizaun mak sai filmaker iha Timor-Leste, ne’ebé mak kompetetivu no inovativu. “Ami-nia luta mak atu rezolve problema iha rai laran. Exemplu, kona-ba ambiente tasi, kona-ba fo´er ne’ebé ema soe arbiru”.
Nia informa, Campis Filmmakers mós kria ona, filme tolu. “Primeiru kona-ba Zebra Croz, segundu kona-ba ambiente tasi, terseiru mak Luta ba Futuru, ne’e fokus liu ba edukasaun,” hateten produtór filme ne´e.
Produtór Filme, José Maria de Fátima Amaral haktuir durante produsaun filme dezafiu ba sira mak tempu ho osan. “Tanba bainhira ita atu ba shooting (foka), ita presiza han hemu, uza transporte, difisil liu mak iha parte editing no difisil liu orsamentu tanba atu ba shooting ita presiza han hemu, transporte ba mai tanba lokál la’´os ida de’it”.
“Atu sai hanesan filmaker ne’e la’ós fasil, presiza han tempu no difisil liu mak la iha orsamentu. Maibé, ami utiliza rasik ami-nia orsamentu liuhusi kontribuisaun hodi hala’o ami-nia atividade,” nia hatutan.
Maske nune´e, tuir produtór filme José Maria dezafiu sira ne´e sira konsege ultrapasa.
“Tanba ami hakarak sai Filmmaker ida ne’ebé independete, esforsu nafatin, ida ne’e parte ida ami kria kampu trabalhu ba ami-nia aan rasik, maibé karik husi NGO no kompañia ne’ebé atu suporta, kapás liu tan tanba ami-nia objetivu atu dezenvolve rai Timór,” nia kompromete.
Notísia relevante:DIFF Lansa Portál Ba Kompetisaun Prodús Filme Badak
Jornalista: Nelia Fernandes
Editór : Rafy Belo
