DILI, 07 outubru 2019 (TATOLI) – Prezidente Partidu Demokrátiku atuál membru Parlamentu Nasional, Mariano Assanami Sabino, husu ba lider sira, liuliu polítiku sira, atu kuidadu saran lia ba setór justisa atu la bele prejudika integridade justisa Timor nian iha povu nia matan.
Assanami hateten lia hirak ne’e relasiona ho deklarasaun balun ne’ebé fó sai husi Ministru Justisa (MJ), Manuel Cárceres da Costa, katak nia sei sobu “mafia justisa”.
Assanami hateten, lider no polítiku sira ne’ebé okupa kargu iha instituisaun Estadu tenke kuidadu ho nia linguajen, tanba bainhira hateten, “mafia justisa” bele lori interpretasaun ba públiku atu la respeitu justisa ninia integridade.
“Se ita ukun nain sira, ita hanesan ministru tutela ba justisa dehan justisa iha mafiozu mak neineik ba neineik ema la fiar no la respeita tan ona justisa iha Timor-Leste. Ita atu lori nasaun ne’e ba ne’ebé,” afirma Mariano Assanami Sabino nu’udar mós lider potensiál jerasaun foun iha rai ida ne’e bainhira sai oradór prinsipál iha seminar nasionál Programa Monitorizasaun Sistema Judisiál (JSMP) nian, foin lalais ne’e.
Nia husu ba autoridade kompetente sira iha instituisaun Estadu sira di’ak liu relata serbisu tuir ida-idak nia kompeténsia, se lae kuandu laiha rezultadu mak ema sei la fiar justisa.
Nia esplika, alternativu seluk atu ajuda problema nee mak instituisaun estadu sira tenke koopera malu atu bele dezenvolve instituisaun ida tuir nia kompeténsia.
Jornalista : Domingos Piedade Freitas
Editór : Francisco Simões
