DILI, 07 outubru 2019 (TATOLI)-Vise Ministra Solidariedade Sosiál no Inkluzaun (VMSSI), Signi Candrawati Verdial, aprofunda katak, MSSI apoia no suporta Asosiasaun Feto Munisípiu Dili (AFEDIL) hodi hala’o sira knar hakbi’it feto hodi partisipa iha dezenvolvimentu.
Notísia Relevante : AFEDIL Preokupa Ekonomia La Suporta Feto
“Ha’u apoia tomak ba ha’u-nia feto maluk no suporta nafatin ita boot sira atu oinsá feto barak liu tan mak hola fatin iha dezenvolvimentu,” afirma
Vise Ministra Signi Candrawati Verdial, hodi responde Ajensia TATOLI bainhira partisipa iha Kongresu ba da-ruak AFEDIL nian, ohin, iha Salaun MSSI, Caicoli, Dili.
Husi sorin seluk, Adjuntu Autoridade Munisípiu Dili, José Smith, salienta katak, presiza iha vontade, vizaun no hanoin ida kriativu hodi lori duni feto ba prosesu dezenvolvimentu no mós futuru nasaun ne’e nian.
“Ita iha ona prosesu atensaun ba partisipasaun feto potensiál ba dezenvolvimentu lokál no ita mós iha estratéjia ida atu hakat ba oin,” hateten José Smith.
Papél feto nian, tuir José Smith, importante atu asegura no apoia nune’e bele partisipa hodi foti desizaun ba kualkér asuntu ba aban bainrua kuandu Munisípiu Dili hamriik no iha ona nia podér rasik.
Jornalista : Osório Marques
Editór : Francisco Simões
