DILI, 09 outubru 2019 (TATOLI) – Tuir planu iha 17 outubru 2019, Ministru Transporte no Komunikasaun (MTK), José Agostinho da Silva, sei arranka bá Xina hodi halo lansamentu dahuluk ba konstrusaun Ró Nakroma II.
“Ita-nia prezensa importante tanba konstrusaun Ró Nakroma II molok hahú tenke halo lansamentu dahuluk, hanesan halo uma ida karik presiza tau fatuk dahuluk (primeira pedra)”, ministru ba jornalista sira hafoin enkontru Konsellu Ministru iha Palásiu Governu, ohin.
Ministru haktuir : “Parte Komisaun Nasionál Aprovizionamentu informa mai ha’u kuandu ha’u fila hosi Kanadá katak tempu badak nia laran, oinsá maka ita bele dezloka bá Xina hodi halo lansamentu ba konstrusaun Ró Nakroma II ne’ebé sei hala’o iha Xina”.
Maski data determina ona maibé, membru Governu atu halo dezlokasaun tenke hetan autorizasaun hosi Xefe Governu.
Orsamentu ba konstrusaun Ró Nakroma II, Governu Timor-Leste prepara osan millaun €7,1 enkuantu hosi Governu Alemaña apoia millaun €7,8.
Ba konstrusaun ró ne’e, Governu TL no Alemaña asina kontratu ho dokumentu liuhusi Estaleiru Navál “Demen”, iha maiu 2019.
Serimónia asinatura ne’e bazeia ba kooperasaun entre Governu RDTL ho Governu Federál Alemaña.
Ró Nakroma daruak ne’e komprimentu totál ho medida 67,30, largura ho medida metru 16,00, kaladu ho medida metru 3,30, altura konves karga ho medida metru 4,80, velosidade 10 knots/13 knots, propulsaun 2X950 kw (2X1290), distánsia 1,700 millas nautikas, kapasidade karga tonelada 940, kapasidade pasajeiru 380 PAX, sosiedade klasifikadora DGL, kompozisaun klase 370 klase ekonomia, 10 ba VIP no tripulante hamutuk 16.
Notísia relevante : Governu TL ho Alemaña Asina Kontratu Ró Nakroma 2
Jornalista : Natalino Costa
Editora : Maria Auxiliadora
