DILI, 10 outubru 2019 (TATOLI)-Ensinu Superiór Privadu, UNDIL (Universidade de Dili) organiza feira kona-ba siénsia no abilidade ho tema jerál katak “Iha Vizaun Mai Ho Asaun, Sei Muda Timor Ida di’ak Liu Ba Timoroan Tomak”.
Iha feira ne’e, Vise-Reitór UNDIL hateten katak iha feira ne´e estudante sira bele hatudu buat ne’ebé sira kria.
“Ita komesa buka oportunidade hanesan ne’e hodi fó sai buat ne’ebé ita iha maibé labele hotu de’it ba iha ne’e, ita tenke buka hatene liután, tanba sosiedade nia problema barak tebes,” hateten Vise-Reitór
Akadémiku UNDIL ne´e, iha biban ne´e, dezafia liután estudante sira atu bele kria produtu sira ne’ebé di’ak liu. “Estudante husi área industria ne’e serbisu bo’ot tebes. Ha´u haree buat barak ne’ebé maka ha´u haree tiha ona, ha´u hakarak iha progresu liután. Ha´u hakarak dezafia liután imi atu labele satisfas de’it ho buat ne’ebé iha”.
“Ema ida kuandu iha valór ba nia aan uainhira nia prodús buat ruma di’ak maka nia foin senti nia aan iha valór. Maibé se ho valór de’it, eskola hotu nia sei la kontente ho nia an rasik,” Vise-Reitór ne’e kompara relasiona ho kapasidade aprezentasaun estudante sira nian iha podusaun estudante sira nia kona-ba ekipamentu sira.
Nia insiste mós katak: “Ohin loron ita haree iha karaik (terenu) la’ós de’it valór A ka B maibé husi abilidade ne’ebé imi iha, ne’e hanesan kultura di’ak ida, ita presiza organiza no koordena di’ak liután”.
Enkuantu, Agapito Manuel Fatima, Dekanu Departamentu Enjiñeria hateten preparasaun ne’e hala’o antes ona entre nivél estudante ho estudante ho departamentu no fakuldade. “Iha tinan kotuk liubá ami konsege hala’o feira ne’e, no nia vantajen kapás tebes hodi kapasita, mentaliza no promove estudante sira-nia aan iha ita-nia loron feira no abilidade ne’e”.
“Hosi atividade ne’e iha mós pasu ne’ebé di’ak tebes tanba Ho kreatividade sira nian sira bele kria buat barak nune’e mós transformativu tanba buat ne’ebé sira estuda sira bele esplika iha ne’ebá. Iha mós inovasaun, sira halo prpdusaun barak. Ita haree buat ne’ebé la valor tiha ona maibé sira uza hodi halo fali produsaun sira,” konsidera dekanu ne’e
Nia fó sasin, ha produsaun sira ne’e sira prodús matéria hanesan kadeira, mákina dulas nuu, mákina ko´a hare, kaixa fixa. “Sasán sira prodús ne’e hanesan ho tinan kotuk nafatin maibé iha mudansa uitoan ba tinan ida ne’e tanba tinan ne’e sira prodús tan kadeira sofá ne’ebé halo hosi bidon”.
Fundu ba atividade feira siénsia UNDIL ne´e maihusi patrosinadór sira. “Atividade ne´e implementa dalarua ona no hetan apoiu hosi Globus no TT (Timor Telekom). apoiu fundu mai hosi Globus ho montante $300 iha tinan kotuk no $300 ba tinan ida ne’e nune’e mós apoiu pulsa ba estudante sira hosi TT,” dehan dekanu enjeñária UNDIL ne´e.
Entretantu ekipamentu sira ne’e, tuir dekanu ne’e katak sei utiliza fali ba departamentu no fakuldade hafoin ramata feira.
Jornalista:Nelia Borges
Editór : Rafy Belo
