DILI, 11 outubru 2019 (TATOLI) – Iha sesta ne’e, ekipa delegasaun nível altu Banku Dezenvolvimentu Aziátiku (ADB-sigla Inglés) hasoru malu ho Primeiru-Ministru, Taur Matan Ruak, iha Paláçio do Governo hodi esplika kona-ba mudansa asisténsia ne’ebé ADB halo.
“Ohin ami mai hasoru Primeiru-Ministru ho objetivu atu esplika no marka mudansa ne’ebé ADB foti katak uluk ADB nia asisténsia ba Timor-Leste organiza ho grupu nasaun Rejiaun Pasífika no agora ba oin ADB nia asisténsia sei organiza hamutuk ho nasaun sira iha Rejiaun Sudeste Aziátiku,” tenik Diretór Jerál ADB ba Departamentu Rejionál Sudeste, Ramesh Subramaniam, ohin.
Nia dehan, iha esplikasaun ne’ebé ekipa ADB hato’o ba Primeiru-Ministru ne’e, halo Xefe Governu haksolok tebes tanba iha mudansa ne’e bele lori Timor-Leste tama lalais ba Association South East Asian Nations (ASEAN).
“Primeiru-Ministru hateten nia kontente tebes tanba mudansa ne’ebé ADB halo bele muda Timor-Leste atinje nia objetivu atu adere ba ASEAN,” nia haktuir.
Haree ba asisténsia ADB nian halai liubá setór estrada, tanba ne’e, Primeiru-Ministru hakarak ADB bele fó mós asisténsia ba iha setór saneamentu no irigasaun liliu kapasidade área tékniku.
“Entaun, semana ida ne’e, ami mai ho ekipa boot ida inklui mós diretór sira ne’ebé responsável ba setór ida-idak nune’e bele hasoru ho ministériu oioin atu halo vizita ba munisípiu sira no mós projetu sira. Depois ramata, misaun ida-ne’e mak ami sei diskute kle’an ho ministériu kompetente oinsá ita bele hametin kolaborasaun,” nia dehan.
Nia hatutan, ADB prontu fó asisténsia ba rekomendasaun ne’ebé Primeiru-Ministru husu hanesan irigasaun no saneamentu.
“Ami prontu. Baibain ADB nia programa bele prepara planu ba tinan tolu oin mai no ami besik finaliza ona planu tinan tolu oin mai nian. Ami prontu atu fó asisténsia. Uluk ami fó asisténsia têkniku hodi prepara projetu investimentu. Agora, projetu balu loos ona entaun ADB mós bele oferese rekursu finanseiru. Ami mós toma nota ba intervensaun ne’ebé ohin Primeiru-Ministru bainhira ami finaliza programa tinan tolu oin mai nian,” nia subliña.
Jornalista: Hortençio Sanchez
Editór: Xisto Freitas
