DILI, 19 outubru 2019 (TATOLI) – Ministériu Turizmu, Komérsiu no Indústria (MTKI), ohin, enserra ona feira lokraik iha Jardín B. J. Habibie Bidau-Santa Ana.
Espozisaun ne’e halo abertura iha 20 setembru liuhosi MTKI iha Diresaun Nasionál Empreendimentu no Atividade Produtu Turístiku, koopera ho Polísia Nasionál Timor- Leste (PNTL), Protesaun Sivíl no autoridade lokál Munisípiu Dili.
Feira ne’e nu’udar atividade ne’ebé aliña ba komemorasaun tinan 20 Misaun INTERFET (Forsa Internasionál ba Timor-Leste) hodi hanoin hikas fali istória hodi bá oin bele promove sítiu turístiku sira iha Timor-Leste.
Atividade ne’e loke iha tuku 4:00 no tuir oráriu kada semana ida dala rua iha sesta no sábadu ho durasaun durante fulan ida hahú husi 20 setembru to’o 20 outubru tinan ne’e, ne’ebé realiza ho orsamentu rihun $35.
“Ohin, ita halo ona eserramentu ba feira lokraik ne’e tanba la’o ona durante fulan ida,” Diretór Jerál Turizmu MTKI, José Filipe Dias Quintas, afirma iha jardín B. J. Habibie.
Nune’e nia agradese ba PNTL no Ajénsia Dezenvolvimentu Nasionál (ADN), abitante kapitál Dili, negosiante sira tanba koopera malu hodi garante seguransa no estabilidade la’o di’ak tebes to’o feira ne’e la’o ho susesu.
“Ami iha informasaun katak kada loron negosiante sira hetan osan $200, ne’e fó benefísiu ekonómiku ne’ebé di’ak tebes”, nia afirma ho kontente.
MTKI nota katak eventu ne’e importante tebes tanba promove kultura, dansa tradisionál, artezanatu, kriatividade joven, hahán lokál no família barak halo movimentasaun ne’ebé nakonu ho amizade.
Tanba ne’e José Quintas kompromete iha tinan oin, MTKI kontinua eventu ida ne’e ho durasaun tempu fulan tolu to’o fulan neen.
“Oitavu Governu sei prevee nafatin osan hodi realiza eventu ne’e liuliu koopera nasaun viziña sira atu promove identidade Timór ba mundu”, nia kompromete.
Diretór Turizmu ne’e aviza ba vendedór no vizitante sira atu kontinua so’e lixu iha fatin atu asegura ambiente saudavel.
Entretantu, Komandante PNTL Munisípiu Dili, Superintendente Xefe Armando Monteiro, hateten orgullu no agradese ba rezidente iha kapitál tanba koopera malu to’o eventu ne’e la’o susesu.
“Ita hotu hamutuk atu garante no seguransa mak xave ba dezenvolvimentu turizmu, ha’u agradese ba MTKI no populasaun no joven sira tanba to’o ohin laiha asidente”, dehan.
Negosiante Ai-han Lokál, Martinha Marques, satisfeitu tanba durante iha espozisaun loraik ne’e fó retornu ekonómiku. “Ami kontente tanba hetan benefísiu iha feira loraik ne’e durante semana ida”, katak.
Feira ne’e rejista grupu hamutuk 70 hodi promove no fa’an sira-nia sasán iha eventu ne’e.
Notísia relevante : Liuhosi Feira Bele Sukat Kapasidade Timoroan Promove Produtu no Identidade TL ba Mundu
Jornalista : Florencio Miranda Ximenes
Editora : Maria Auxiliadora
