DILI, 22 outubru 2019(TATOLI)-Provedoria Diretu Umanu no Justisa (PDHJ-sigla portugés) hala’o semináriu internasionál hodi diskute isu no pratika di’ak ba protesaun ema ho defisiénsia.
Semináriu internasionál ne’ebé hala’o durante loron tolu, hahú tersa-kinta (22-24/10/2019), partisipa hosi reprezentante órgaun kompetente sira iha rai laran no mós reprezentante hosi instituisaun membru the south East Asia National human rights institutions forum (SEANF) tuir konvensaun internasionál ema ho defisiénsia.
Semináriu nee ho tema “ensuring the inclusiveness and equality for person with disabilities” partisipa mós reprezentante hosi Indonézia, Malázia, Tailándia, Filipina no Myanmar.
Objetivu hosi semináriu nee maka kompartilla informasaun kona-ba konkluzaun prinsipál balu iha estudu kona-ba problema ema ho defisiénsia sira ne’ebé enfrenta iha instituisaun membru SEANF sira, inklui, troka esperiénsia, pratika nian no ezemplu kona-ba estratéjia no promosaun no protesaun ema ho defisiénsia husi estadu membru SEANF ho organizasaun sosiedade sivíl.
Alende nee diskute kona-ba dezafiu no difikuldade hodi asegura inkluzaun no igualdade ba ema ho defisiénsia hodi fó advokasia ba Governu no Parlamentu Nasionál atu ratifika konvensaun internasionál diretu ema ho defisiénsia.
Grupo sira ne’ebé tama kategoria ema ho defisiénsia maka defisiénsia sira, LGBTI, feto, labarik, indíjena, maioridade ,ferik no katuas.
Semináriu nee ofisializa abertura hosi Provedora Direitu Umanu no Justisa, Jesuína Maria Ferreira Gomes.
Jornalista : Agapito dos Santos
Editór : Francisco Simões
