DILI, 22 outubru 2019 (TATOLI) – Parlamentu Nasionál (PN) liuhosi sesaun plenária iha tersa ne’e, fó votu pezar ba falesimentu eis Ministru Defeza, Cirilo José Jacob Valadares Cristóvão, ne’ebé hakotu iis iha Bali Royal Hospital (BROS), Denpasar, Indonézia, ho votu a-favór 55, kontra 0 no abstensaun 0.
Prezidente Parlamentu Nasionál (PPN), Arão Noé de Jesus da Costa Amaral, hateten Parlamentu fó votu pezár tanba Matebian nu’udar membru governu iha VI Governu Konstitusionál.
“Ami fó sentidu kondolénsia ba saudozu hanesan eis Ministru Defeza, Juís iha Tribunál Distritál Dili, no nia mós lidera Komisaun Rekonsiliasaun no Pás iha 2003. Tanba ne’e haree ba ninia kontribuisaun ne’e tomak maka Parlamentu Nasionál liuhosi plenária fó votu pezár, hodi fó omenájen ikus ba Señor Cirilio”, tenik Arão Noé, tersa ne’e.
Xefe Bankada CNRT, Duarte Nunes, hato’o sentidu kondolénsia ba família tomak.
“Ami hato’o sentidu kondolénsia kle’an ba família matebian”, nia tenik.
Nune’e mós, Deputada Bankada CNRT, Carmelita Caetano Moniz, espresa ninia sentimentu ba falesimentu ninia amigu.
“Ha’u-nia amigu boot tebes no hanesan ona ha’u-nia maun. Deskansa ho hakmatek iha Maromak nia Kadunan Santu”, dehan nia.
Deputadu Bankada FRETILIN, Antoninho Bianco, hato’o sentidu kondolénsia ba família matebian.
“Husik ona mundu permanente, ita-nia memória mós permanese iha ami-nia moris no ami mós reza ita boot la’o ba Nai Maromak sei haraik ita na fatin di’ak”, dehan Deputadu Bankada Opozisaun ne’e.
Jornalista : Evaristo Soares Martins
Editór: Xisto Freitas
