DILI, 30 outubru 2019 (TATOLI)-Komunidade iha kapitál Dili, ohin, hahú hamoos ona semitériu Santa Krús, Becusse ho Cacaulidun, hodi prepara ba selebra loron matebian (finadu) iha loron 02 novembru mai ne’e.
Agapito Martins Soares, nu’udar komunidade Dili ne’ebé hamoos hela rate família nian iha Semitériu Santa Krús, hateten, tinan-tinan atu tama ba loron boot finadu sempre hamoos ona rate hodi bele to’o nia loron lori lilin ho ai-funan mai sunu no kari tuir Timor-oan nia fiar no nia tradisaun.
“Finadu ne’e importante ba ita atu hatudu ita nia domin ba ita nia matebian sira, liu hosi ai-funan ho lilin ne’ebé ita sei mai kari no sunu iha matebian sira nia loron mak 02 novembru,” hateten Agapito Martins Soares, ba Ajénsia TATOLI bainhira hamoos hela família nia rate iha Semitériu Santa Krús, Dili.
Komunidade sira ho entuziazmu tebes, ida-idak lori ai-sar no nesesidade seluk hodi dasa no hamoos fo’er sira iha semitériu laran. Iha família balun mós lori tinta ba pinta rate no balun lori bee ba fase rate nia lolon sira.
Jornalista : Nelson de Sousa
Editór : Francisco Simões
