DILI, 13 novembru 2019 (TATOLI)-Komisaun Funsaun Publika (CFP-sigla portugés), Komisaun Anti Korrupsaun (CAC-sigla portugés), Provedoria Direitu Umanu no Justisa (PDHJ-sigla portugés) ho Inspesaun Jerál Estadu (IJE), ohin, selebra akordu kooperasaun quadri lateral, hodi asegura lala’ok governasaun di’ak iha instituisaun estadu.
Notísia Relevante : KAK, IJE, PDHJ ho KFP Buka Tuir Indísiu KKN Rekrutamentu Traballadór iha SEFOPE
Akordu ne’e nu’udar renovasaun ida ne’ebé antes ne’e implementa ona iha tinan 2015-2019 hodi extende ba oin durante periodu tinan haat 2019-2023.
Serimónia asinatura akordu ne’e hala’o iha salaun enkontru KFP, Matadoru, Dili, ne’ebé asina diretamente hosu Prezidente KFP, Faustino Cardoso Gomes, Komisáriu KAK Sergio Hornay, Provedora PDHJ, Jesuína Maria Ferreira Gomes ho Inspektór Jerál Estadu Francisco de Carvalho.
Akordu ne’e sai hanesan matadalan ba instituisaun haat ne’e hodi servisu hamutuk atu haree ba iha asaun inspesaun konjunta, servisu diseminasaun, atividade vizita surpreza ba instituisaun estadu sira no seluk tan atu garante governasaun di’ak tuir interese Estadu no povu.
Prezidente KFP, Faustino Cardoso Gomes, esklarese katak, alvu hosi akordu kooperasaun servisu entre instituisaun hat ne’e mak hakarak atinje meta hodi asegura funsaun publika hala’o servisu ho kualidade no responsabilidade ba interese Estadu.
Kona-ba irregularidade hira mak identifika ona husi servisu inspesaun ekipa konjunta durante 2015-2019, Faustino Cardoso Gomes, hateten, jerálmente presiza hadi’a dezempeñu servisu iha instituisaun Estadu sira atu bele kumpre regra servisu.
“Ha’u la lembra nia númeru loloos kona-ba irregularidade ne’ebé akontese durante nee, maibé instituisaun Estadu barak mós mak komete irregularidade,” Faustino tenik.
Iha fatin hanesan Komisáriu KAK, Sergio Hornay, aprofunda, akordu kooperasaun importante tebes bele hametin dezenvolvimentu institusionál, liu-liu oinsá buka forma atu bele hasa’e kualidade no prestasaun servisu iha instituisaun Estadu sira.
Nia fiar katak, instituisaun Estadu sira ho nia subordinadu sira sei kumpre dezempeñu servisu hotu tuir mandamentu Estadu nian ba interese Estadu no serve povu.
Jornalista : Nelson de Sousa
Editór : Francisco Simões
