DILI, 26 novembru 2019 (TATOLI)-Prezidente Autoridade Munisípiu Dili halo ona komunikasaun no koordenasaun ho Komandu Polisia Nasional Timor-Leste (PNTL) Munisípiu Dili, Ajénsia Dezenvolvimentu Nasional (ADN) no setór privadu balun, atu oinsá buka solusaun ba muda komunidade ho mestre balun ne’ebé sei hela nafatin iha arredores eskola públiku sira iha Dili laran.
Atu bele iha atinjimentu ba planu ne’e, ohin, parte sira halo enkontru koordenasaun ne’ebé lidera hosi Prezidente Autoridade Munisípiu Dili, Gaspar Soares, akompaña hosi Adjuntu Prezidente Autoridade, José Smith, hamutuk Diretór ADN, Samuel Marçal no Segundu Komandante Munisípiu Dili, Superintendente Asistente, Euclides Belo.
Adjuntu Prezidente Autoridade Munisípiu Dili, José Smith dehan, governu identifika ona komunidade família uma kain liu lima (5) maka too agora okupa hela edifísiu Eskola Tékniku Vokasionál 28 Novembru Becora Dili nian.
Nia dehan, governu fó ona avizu, see komunidade lakohi koopera hodi muda sai, governu sei uza forsa hodi hasai obrigatóriu.
Nia dehan, se komunidade sira hakarak muda sai, Autoridade Dili sei buka apoiu transporte hodi tula ajuda komunidade sira nia sasán.
Autoridade Munisípiu mós apela ba mestre no estudante sira ne’e atu buka fatin seluk hodi hela, tanba durante tinan barak sira hela iha edifísiu eskola afeta mós ba prosesu aprendizajen.
“Ita apela ba profesór no alun sira dezde 2015 kedas, mais la hatene nusa maka sira lakohi sai, ita tenke hanoin eskola ne’e fatin ba ema atu aprende, la’ós atu ba hela fali iha ne’ebá,” afirma José Smith.
Autoridade Dili ba tinan ne’e implementa projetu hadi’a edifísiu eskola hamutuk ualu (8) no sede suku lima ne’ebé tama kategoria atu halo reabilitasaun emerjénsia.
Iha fatin hanesan, Segundu Komandante Munisípiu Dili, Superintendente Asistente Euclides Belo deklara, PNTL prontu atu asegura seguransa no koopera ho autoridade Dili muda sai okupante sira ne’e.
“Parte PNTL prontu fó apoiu seguransa, tanba eskola ne’e fatin ba aprende, la’ós fatin atu ba ema hela, agora ita sei koordena para rezolve problema ne’e,” dehan Euclides.
Nia dehan, liuhosi koordenasaun ne’e parte PNTL prontu apoiu seguransa bainhira Autoridade Dili fó xamada hodi muda sai okupante sira iha kualkér tempu.
Jornalista : Eugénio Pereira
Editór : Francisco Simões
