DILI, 29 novembru 2019 (TATOLI)–Igreja Dioseze Dili hahú koordena ona ho Komandu Polisia Munisípiu Dili (KMD) atu hala’o sosializasaun ba sarani sira hotu atu labele lori fogete tiru barullu durante serimónia misa kalan Natál, 25 dezembru 2019 no tinan foun, 1 Janeiru 2020.
Segundu Komandante Polisia Munisípiu Dili, Superintendente Asistente Polisia, Euclides Belo dehan, nia parte simu ona konvite hosi Diretór Komisaun Justisa no Pás, Dioseze Dili, Padre Hermínio Gonçalves, atu halo ona enkontru koordenasaun atu realiza programa sosializasaun ne’e iha tempu besik.
“Ami buka koordena ba malu ona ho Dioseze Dili atu sei halo konferénsia ida iha Dili atu servisu konjunta para depois bandu ita sarani bainhira ba tuir misa natál kalan no tinan foun labele lori fogete,” hateten Euclides Belo ba jornalista, ohin, iha Komandu Polisia Munisípiu Dili iha Caicoli.
Igreja rasik mós forma ona seguransa eskuteiru opa mean hodi koordena ho polisia halo seguransa másimu ba misa kalan natál no tinan foun iha Igreja Parókia hotu- hotu.
Komandu Polisia Dili alerta ba inan-aman sira atu kontrola no bandu labarik ki’ik sira ba misa labele lori fogete tanba esperiénsia kada tinan hatudu bainhira polisia halo identifikasaun iha terrenu ka’er labarik barak liu mak lori fogete.
Euclides hatutan, polisia se la tolera bainhira identifika labarik sira lori fogete sei ka’er no bolu inan-aman atu responsabiliza aktu ne’e. Tanba dala ruma iha misa labarik sira tiru no sae fogete nakfera kona fali ema seluk sai vítima.
Parte seluk, Komandante Polisia Munisípiu Dili, Superintendente Armando Monteiro mós hatún ona orientasaun ba komandante postu administrativu sira iha semana ne’e sei halo operasaun kontrolu negosiante sira labele fa’an fogete.
“Ami sei halo operasaun no kontrolu mós ba ita nia negosiante sira ne’ebé fa’an fogete sei bandu hotu, exeptu see kuandu negosiante sira hetan autorizasaun hosi governu,” Armando Monteiro hateten.
PNTL sei la autoriza kualkér grupu atu fa’an fogete tenke hetan orientasaun legál hosi Governu Timor-Leste. Tanba Servisu Informasaun Polisia (SIP), Ofisiál Polisia Suku (OPS) no Membru Konsellu Polisiamentu Komunitáriu (KPK) kontinua halo kontrolu nafatin iha sidade Dili.
Jornalista : Eugénio Pereira
Editór : Francisco Simões
