DILI, 29 novembru 2019 (TATOLI)-Komandu Polisia Munisípiu Dili iha tempu besik sei fó pose ba estrutura membru Konsellu Polisiamentu Komunitáriu (KPK) Suku 12 iha Munisípiu Dili nian hodi kompleta estrutura KPK iha suku 34 ne’ebé pertense ba Munisípiu Dili.
Notísia Relevante : Membru KPK Suku Tolu iha Dili Tuir Formasaun ba Prevensaun Konflitu
Antes ne’e, PNTL fó tiha ona pose ba membru KPK iha suku 22, kompostu hosi Postu Administrativu Ataúro ho suku lima hanesan, Beloi, Biqueli, Macadade, Maquili no Vila Maumeta.
Postu Administrativu Cristo Rei ho suku (7), Balibar, Becora, Bidau Santana, Camea,Culu Hun, Hera no Meti Aut. Postu Administrativu Dom Aleixo ho suku hitu (7), Bairru- Pité, Comoro, Madohi, Maneluana, Fatuhada, Bebonuk no Kampung Alor, no Postu Administrativu Metinaro iha suku rua (2), mak Suku Duyung no Sabuli.
Postu Administrativu Nain Feto iha suku neen (6); Acadiru Hun, Bemori, Bidau Lecidere, Gricenfor, Lahane Oriental no Santa Cruz, nune’e Postu Administrativu Vera Cruz iha suku hitu (7), Caicoli, Colmera, Dare, Lahane Ocidentál, Mascarenhas, Motaél ho Vila Verde.
Segundu Komandante Polisia Munisípiu Dili, Superintendente Asistente Polisia, Euclides Belo dehan, durante ne’e membru KPK suku 12 iha Dili nian tuir ona formasaun hodi hakle’an sira nia koñesimentu tuir Norma Organizasaun no Prosesamentu (NOP) nian.
Euclides Belo informa ba jornalista sira, ohin, iha Komandu PNTL Munisípiu Dili iha Caicoli, hateten, PNTL hala’o misaun hatuur iha lei mak defende legalidade demokrátiku, seguransa sidadaun, no próteze direitu sidadaun sira tuir termu ne’ebé estates ona iha K-RDTL.
Komandu PNTL kria koordenasaun hodi estabelese KPK sai nu’udar forma ka mekanizmu iha ne’ebé polisia no komunidade bele tuur hamutuk hodi diskute, prevene no rezolve problema balun ne’ebé mosu iha suku laran.
KPK haforsa liután estrutura Konsellu Suku hodi hametin seguransa públiku no promove koezaun sosiál. Lei Suku Nú.9/2016 fó kompeténsia ba suku sira atu fó apoiu ba KPK hosi PNTL (Artigu 6.1(y).
Euclides agradese, mezmu Governu seidauk fó insentivu ba KPK, maibé sira servisu masimu koopera ho polisia iha tempu kalan no loron hodi asegura estabilidade.
Jornalista : Eugénio Pereira
Editór : Francisco Simões
